Skutedag i Skålafjæro

I høve galeasen «Loyal» sitt 140-års jubileum vert det laurdag 16. september skipa til ein stor maritim dag i Rosendal.

I tillegg til ærverdige «Loyal», vil fleire fine skuter besøka Rosendal og Skålafjæro denne laurdagen. Det vert musikk og song på kaien, samt overrekking av gåve til Gurineprosjektet. Er du nyfiken på galeasen si historie, vert det mogleg å få svar inne i Folgefonnsenteret denne dagen. Her vert det sett opp eit eige føredrag som tek føre seg både «Loyal» og Gurineprosjektet.

På kaien utanfor senteret set arrangørane både store og små i aktivitet, og kan freista med knuteknyting, båtlaging, kajakkpadling og shantysynging med Håkon Vatle.

– Det vil også vera gang på Vangssago og open verv der Gurine er i ferd med å bli restaurert. Så her i bygda skjer det mykje heile dagen, står det å lesa i ei pressemelding.

Og etter ein dag med gebursdagsfeiring og mykje fagleg påfyll, kva er vel då betre enn å avslutta med ein dansegalla i Rosendal samfunnshus? Der byr bandet Aristocats opp til dans, og vil halde det gåande utover kvelden.