Skipar til Rosendalsveko

Mange gode krefter kjem til Folgefonnsenteret i august for å delta på den nye konferansen som ber namnet «Rosendalsveko».

 

Rosendalsveko går av stabelen 10. og 11. august, og har undertittelen «Klima, energi og berekraft på Vestlandet». Konferansen er eit samarbeidsprosjekt mellom Folgefonnsenteret, Havforskingsinstituttet og Bjerknessenteret for klimaforsking.

– Med Rosendalsveko ynskjer vi å samla kunnskapsinstitusjonar, næringsliv, samfunnsliv og politikarar på Vestlandet til idémyldring kring klima, energi og berekraft. 10. og 11. august møtast vi i Rosendal for å diskutera utfordringane og moglege løysingar. Fokus vert på klima og ekstremvêr, nye næringar og grøn vekst, fornybar energiproduksjon og distribusjon, areal under press, og berekraftig ressursforvaltning, opplyser Una Kolle, dagleg leiar i Folgefonnsenteret.

 

Konsert

I tillegg til Kolle, består programkomiteen av Kerim Hestnes Nisancioglu og Jostein Bakke frå UIB/Bjerknessenteret, samt Geir Lasse Taranger frå Havforskingsinstituttet. Dei har hyra inn ordførar Hans Inge Myrvold til å føreta den offisielle opninga saman med Sissel Rogne, direktør i Havforskingsinstituttet, og Tore Furevik, direktør for Bjerknessenteret.

Utover den fyrste dagen vert det fullpakka med debattar og faglege innlegg, mellom anna om «Konsekvensane av klimaendringar» og «Havbruk og blågrøne næringar». På kvelden vert det invitert til guida tur og idémyldring i Rosendal, etterfølgd av middag og konsert med Ingebjørg Eik band på bryggja.

 

Neste år

Dag nummer to byr på nye gode diskusjonar og føredrag. Blant temaa då er «Blågrøn transport», «Verdsarven og berekraftig reiseliv» og «Vestlandet i eit globalt perspektiv».

– Grunna smitteverntiltak er det berre lagt ut eit avgrensa tal billettar, så her er det fyrstemann til mølla, understrekar Una Kolle.

I programoversikten vert det allereie slege fast at ein vil ynska velkomen tilbake neste år.