Skal snu kulturhuset på hovudet

Med over 50 lokale musikarar på same scene og ei audiovisuell oppleving kinosalen sjeldan har sett maken til, skal arrangørane frå Gaa Paa og Husnes Musikklag heidra Pink Floyd ei heil helg til endes.

Marius Tveit Nissestad

Marius Tveit Nissestad

marius@grenda.no

12 januar, 2018

– Vi satsar høgare enn vi nokon gong har gjort. Dette vert ei audiovisuell oppleving vi sjeldan har sett maken til her lokalt. Vi vil visa kor bra det faktisk er mogleg å få ting til med lokale musikarar. Og eg er sikker på at det vil verta ganske så heftig, seier Oddbjørn Kloster frå Gaa Paa når Grenda møter han i kinosalen i Kulturhuset Husnes.

 

Ein draum

I mange år har ein kveld som denne surra i bakhovudet til arrangør Kloster. Faktisk har det vore ein draum heilt sidan han som ung og lovande tenåring snurra ei Pink Floyd-plate for aller fyrste gong.

– Pink Floyd i stororkesterformat må berre verta bra. Det har vore ein liten draum for meg lenge, men vart ikkje ein konkret plan før i etterkant av Rock 15, då eg, Annemor Ekeland og Clive Anderson fann ut at dette måtte vi få til, seier Oddbjørn.

Med seg på laget har Gaa Paa Husnes Musikklag og ei rekkje lokale rockeheltar.

– Eg høyrte på Pink Floyd for fyrste gong tidleg i ungdomen, og har høyrt på dei kvar einaste dag sidan. Det er ikkje berre musikken. Det er heile alt rundt. Det tekniske og det visuelle. Alt trefte meg då, og det har ikkje dabba av sidan, seier han og fortel at dei i desse dagar jobbar hardt for at publikum skal få det beste showet Kulturhuset Husnes kan by på.

Han fortel at sjølv om det er Pink Floyd som står i fokus, er dette ein kveld for kvar og ein. Uavhengig om ein likar Pink Floyd.

– Dette kjem til å treffa alle. Det vert musikk frå den nyaste perioden til Pink Floyd. Altså etter den psykedeliske tida. Det vert store hitar på rekkje og rad. Og vi er sikre på at når konserten startar med «Shine On You Crazy Diamon» så er stemninga sett, og den neste halvanna timen vert ei stund med gåsehudfaktor, harmonisk nyting og rockefot, seier han.

 

Obligatorisk

Fasiten på kor bra det vert får vi fyrst 16. januar. Før store delar av musikkmiljøet i Kvinnherad igjen trør til dagen etter.

– Dette er noko ein berre må få med seg. Eg meiner at det på mange måtar er obligatorisk oppmøte for musikkglade kvinnheringar, smiler Kloster.

Fyrstkomande helg reiser heile følgjet til Skånevik og tek del i musikklaget si årlege øvingsutflukt. Her vil dei for fyrste gong køyra gjennom den tredjedelen av konserten kor alle involverte er med.