Skal leggja ny fiberkabel i Opsangervatnet

Tysdag skal Kvinnherad Breiband leggja ny fiberkabel frå Opsanger til Cirkle K-stasjonen på Husnes. Denne kabelen er ein del av prosjektet med sjøkabel mellom Sunde og Rommetveit.

Kvinnherad Breiband har i dag fiberkabel i Opsangervatnet mellom Opsanger og Røsslandslia og det er frå same landtak på Opsanger den nye kabelen no skal leggjast.

– Det vil økonomisk og miljømessig vera det beste med legging av kabel på is. Kabelen blir lagt over isen i Opsangervatnet av eige montørmannskap, skriv Kvinnherad Breiband i ei pressemelding.

 

Tek sikkerheita på alvor

Vidare vil kabelen bli liggjande på isen til smeltinga startar, den vil etter det søkka ned slik den er lagt.

– Kabelen må ikkje flyttast på og det må ikkje skeisast over den eller på anna vis gjerast skade på den, skriv Kvinnherad Breiband.

Dei har gjort fleire målingar av isen og vil fortløpande gjera risikovurderingar for å ivareta sikkerheita på best mogleg måte under oppdraget. Breibandsleverandøren har også varsla lokale naudetatar om arbeidet.

– Det vert på det sterkaste oppmoda til at folk held seg unna det pågåande arbeidet med omsyn til eigen sikkerheit. Dette arbeidet betyr ikkje at isen er klarert for fri ferdsel, skriv Kvinnherad Breiband.

 

Datasenter

Med den nye sjøkabelen på plass får selskapet moglegheit til å kopla saman viktig fiberinfrastruktur.

– Det vert ei vidaresatsing på bedriftsmarknaden, samt ny og sikker tilkomst av internett og tv-signal frå endå ein leverandør utanfor kommunegrensene. I tillegg til det er etableringa av sjøkabel frå Rommetveit til Sunde ei satsing mot ei potensiell etablering av storskala datasenter i Kvinnherad kommune, skriv Kvinnherad Breiband.

Etableringa av eige datasenter er eit prosjekt Kvinnherad Breiband ser fram til å sluttføra i nye lokala i løpet av 2022.