Sjå kven som er med i ungdomsrådet
Torsdag oppretta eit samrøystes kommunestyre det nye ungdomsrådet i Kvinnherad. Dei sju medlemmene får 50.000 kroner til å fordela på gode tiltak.
Artikkelen held fram under annonsen.
Ungdomsrådet får ein koordinator knytt til seg, i lag med politisk sekretær, som skal syta for opplæring, tilrettelegging og oppfølging av rådet. Det vert oppretta ein eigen budsjettpost på 50.000 kroner for ungdomsrådet i Kvinnherad, med delegert myndigheit til å dela ut midlar frå denne.
– Sekretæren og koordinatoren vil vera bindeleddet mellom ungdomsrådet og kommunen. Godt samarbeid med ungdom, og kunnskap om ungdom sin kvardag, er viktig for få dette til. Det trengst kontakt med skulane om møteplanlegging, fritak frå undervisning og organisering av reise til og frå møta. Medlemmer av ungdomsrådet bør møta på fylkestinget for ungdom, og treng kanskje reisefølgje og rettleiing i samband med dette, heiter det i saksutgreiinga.
Dette seier medlemmene om seg sjølve:
Gunnar Hestad (14), Seimsfoss.
– Eg er veldig glad for å vera med i ungdomsrådet i Kvinnherad. Eg er politisk interessert, og meiner at det er viktig at ungdommar er med og bestemmer i kommunen. Me har mange meiningar, og det er viktig at me kan få det fram. Eg tenkjer også at det er viktig at ungdommar frå mindre bygder får ei større stemme i kommunen, seier Gunnar, som går i 9. klasse på Rosendal ungdomsskule.
Oskar Kaldestad (17), Herøysundet.
Artikkelen held fram under annonsen.
– Eg er i ekstase over å få vera med i ungdomsrådet her i Kvinnherad. Det kjennest godt å bli medlem av det ein har etablert frå starten av. Sidan eg var med på å bestemma korleis me skulle gå fram for å etablere dette ungdomsrådet, så er dette fantastisk, seier Oskar, som også var med i prosjektgruppa for ungdomsrådet.
Iris Matre (17), Valen.
– Eg er svært glad for å kunne delta i ungdomsrådet. Det betyr mykje for meg å ha moglegheita til å representera dei unge i kommunen, og å kunne vera med på å påverke lokalsamfunnet, melder Iris.
Annie Kloster (14), Husnes.
– Eg er valt inn i ungdomsrådet av kommunestyret, og gler meg til å sjå korleis det blir! seier Annie.
Artikkelen held fram under annonsen.
Nikolai Strüter Vågen (14), Skorpo
– Det kjennest bra å bli med i ungdomsrådet. Eg tenkjer ungdomsrådet er eit bra medium for ungdom å samla meininga si om ting og tang som kommunen gjer. Eg kan hjelpa å visa ungdommens meining i kommunen, seier Vågen.
Alva Aspmo (15), Sunde.
– Eg gler meg til å vera med og gi ungdommen ei stemma her i kommunen, og påverka korleis kommunen kan bli best mogleg for ungdom, helsar Alva.
Hanna Tvilde (18), Uskedalen.
– Dette blir spennande, eg gler meg veldig til å byrja. Eg håpar me klarar å få fram ungdommane si røyst i Kvinnherad, seier Hanna, som går på Kvinnherad vidaregåande skule og er eldst i rådet.