Måndag opnar SIM miljøsentralane sine igjen. Men dei bed folk som ikkje må kasta avfall om å venta. Arkivfoto.

SIM opnar miljøsentralane

Måndag opnar SIM miljøsentralane sine igjen, men dei ynskjer berre besøk av dei som må kasta avfall.

I tråd med nye retningslinjer frå Fylkesmannen i Vestland og Miljødirektoratet, har SIM bestemt seg for å opna miljøsentralane sine igjen frå og med måndag 6. april. Det skriv dei i ei pressemelding.

Artikkelen held fram under annonsen.

– SIM bed alle kundar som ikkje må ta turen til miljøsentralen om å venta. Sjølv om vi no opnar miljøsentralane vil råd om å hindra spreiing av smitte framleis vera gjeldande, står det å lesa i pressemeldinga.

Har du tenkt å ta turen til SIM for å kasta noko avfall i veka som kjem, har SIM sett opp ei liste med retningslinjer dei bed kundane følgja:

- Godt brukande er stengt inntil vidare

- Kundar og tilsette skal halda god avstand i tråd med FHI sine retningslinjer

- Kundane må vera budde på at det kan bli endre køyremønster

- Det kan bli lange køar og venting

- Berre kundar som MÅ levera avfall, vert oppmoda til å koma. Dei andre vert oppmoda om å venta med rydding.

- Kundane vert bedne om å sortera godt på førehand, slik at opphaldet vert kortast mogleg

Artikkelen held fram under annonsen.

- Berre dei som treng å vera med for å kasta avfallet skal vera med til miljøsentralen

- Me tek ikkje i mot kontantar og det vert ikkje skrive ut kvittering