Set opp buss til NM-avslutninga

Marius Tveit Nissestad

Marius Tveit Nissestad

marius@grenda.no

15 august, 2018

Saman med Slangeservice AS set Ripel’n Racing og Motor opp buss til avslutningsfinalen i NM på Rudskogen 13. september.

– Planen er å få på plass ein buss som kan ta med seg kvinnheringane til Rudskogen. Det er allereie ein god del som har kasta seg med, men det er framleis plass til fleire så det er berre å kasta seg rundt, seier Marius Ripel Jensen.

Finalen av årets superbike-sesong går av stabelen 13. til 15. september. Gjer Marius det godt i begge avslutningskonkurransane kan han køyra seg opp på ein 3. plass samanlagt.

– Vi ligg i dag på ein 4. plass samanlagt, så det har ikkje gått så bra som vi hadde ynskt så langt. Det har vore mykje å setja seg inn i med ny sykkel og slikt, men no når sesongen går mot slutten så har vi funne ut av det. Så eg kan lova dei som blir med å gjera alt. Det blir vel litt show, reknar eg med, seier han og legg til.

– Vi organiserer buss og overnatting for dei som vil bli med, har du lyst til det er det berre å ta kontakt.