Seniorsenteret nærmar seg

Prosjektgruppa i Husnes seniorsenter er optimistar med tru på at gravearbeidet kan koma i gang før jul, og at det kan bli innflytting første halvår 2022.

– Det er full fart om dagen og mykje som skjer på ein gong, skriv prosjektgruppa i Husnes seniorsenter i ei pressemelding.

Denne veka går salsprospektet i trykken og vil bli sendt ut i posten til alle som har meld si interesse og kan tenka seg å flytta inn i Husnes seniorsenter. Vidare inviterer dei til eit sals- og informasjonsmøte i Kulturhuset Husnes 7. oktober.

– Prosjektet er avhengig av nok sal før entreprenørane kan sleppa gravemaskinane til på tomta. Det er med andre ord du som interessent som langt på veg styrer utviklinga framover, skriv prosjektgruppa.

 

I forhandlingar med leigetakar

Dei 29 planlagde leilegheitene kjem i tre størrelsar. 20 av dei vil vera på 69 kvadratmeter, seks på 79 kvadratmeter og tre på om lag 99 kvadratmeter.

– Slik det ser ut i dag, vil prosjektet bli etablert som eit sameige, ikkje som eit burettslag. Kort fortalt inneber dette at du eig bustaden din fullt og heilt og at du kan disponera han som du vil, står det å lesa i meldinga.

Prosjektgruppa er også i forhandlingar med eit lokalt firma om leige eller kjøp av det tiltenkte næringsarealet på bakkeplan.

– Vi har tru på at partane kjem fram til ei god løysing. Som nemnt er det av stor og avgjerande betydning for gjennomføring av prosjektet at dette går i orden. Vi går på alle måtar ei spennande tid i møte, skriv prosjektgruppa.