– Samferdsle i endring

Det er spennande tider i samferdslesektoren for tida, med minst tre – fire aktuelle prosjekt på idé- eller planstadiet. Kommunepolitikar Gretha Rød har til dømes teke opp att den gamle tanken om snøggbåt mellom Husnes og Os, avløyst av buss til/frå Bergen – og har fått både ros og ris for det. Etter Rød si meining vil reisetida til by’n då bli redusert til ca. ein time, mot 2,5 time på det meste i dag.

På same tid skriv avisene at kommunen skal laga eit skisseprosjekt for «Kvifast», ei bru over Husnesfjorden til Tysnes og nye E39. Ordførar Peder Sjo Slettebø opplever at både fylke og stat skjønar at Kvinnherad treng betre kommunikasjon frå/til kommunen, og vil ha fakta på bordet for å sjå om Kvifast kan realiserast.

Det tredje samferdsleprosjektet; innkorting av ferjesambandet mellom Kvinnherad og Stord, ser ut til å ha stoppa litt opp i det siste. I alle fall har politikarane i nabokommunen nyleg sett denne prosessen på vent, om vi forstår referata rett. Det underliggjande argumentet er at det er nok ferjestø på Stord. Langt på veg går det an å forstå denne argumentasjonen, og difor er det berre heilt naturleg at kvinnheringane prøver å finna alternative løysingar.

Koordinator i Fjelbergsambandet AS, Marianne Nordhus, fortel om stor optimisme i prosjektet ho er engasjert i, og rosar lokalpolitikarar og kommuneadministrasjon, som ho tykkjer har stått på og fått det til å skje mykje på relativt kort tid. Kommunen har som mål å senda søknad om ferjeavløysingsmidlar før jul, får vi vita.

 

Husnes – Os

Gretha Rød peikar heilt rett på at det er naturleg at regionsenteret Husnes skal ha betre kommunikasjonar enn i dag. Det same meinte styret i Husnes Vekst allereie i 2004. Og etter det eg hugsar var snøggbåt frå Husnes (Bogsnes) mot Os/Bergen omtalt mange år før det igjen.

Så ideen er slettes ikkje ny, slik Rød heilt rett presiserer. Men utspelet hennar bør vera like kjærkome i dag for det. At slike framtidsretta ruter ofte tar svært lang tid å få realisert, skuldast blant anna at lokalpolitikarar og andre ikkje er flinke nok til å framsnakka prosjekta. Vi har i alle fall ikkje høyrt noko om denne ruta på lange tider.

Men no har i alle fall Gretha Rød sett fokus på saka igjen – og det er bra. Ho seier samtidig til Kvinnheringen at ei bru over Husnesfjorden vil vera det beste i framtida, men at vi er nøydde til å tenkja på det som kan bli gjort no. Snøggbåt frå Bogsnes er blant prosjekta som kan realiserast på relativt kort tid, meiner ho.

Mange deler Rød sine tankar om betring av kommunikasjonane frå Husnes mot Bergen. Men det finst òg dei som er imot, og det er eit typisk kvinnheradfenomen, spesielt når det er snakk om «indre/ytre luten»-fenomenet. Då går alltid nokon i skyttargravene for å verna om det beståande. I dette tilfellet har den gryande motstanden mot ei snøggbåtrute frå Husnes noko med den populære og vellukka ruta mellom Rosendal og Bergen å gjera, og ei frykt for at Rødne-båten skal missa trafikk. Det trur eg er ei sterkt overdriven problemstilling, for eg har lita tru på at det er reisande frå ytre luten som gjev dei gode trafikktala for Hardangerfjordekspressen.

 

Omvegen om Stord

Eg trur derimot at dei fleste reisande frå Husnesområdet som vil ta båt til Bergen, i staden nyttar snøggbåten frå Sunde via Stord, sjølv om reisetida her tar opp i 2,5 time på det meste. Det er denne «omvegen» om Stord, ofte òg via Rubbestadneset og Austevoll, Gretha Rød no har sett fokus på. Innspelet hennar bør i det minste kunna bli seriøst drøfta, utan oppkonstruerte problemstillingar. Men etter å ha lese ordføraren sine kommentarar, er eg sanneleg i tvil om det vil skje (sitat): «Det er ikkje realistisk å gjera noko no, men ein kan ta det med som eit innspel», seier han til Kvinnheringen, og viser til nye snøggbåtkontraktar om fem år. Det er likevel kjekt å registrera at han tykkjer Rød sitt forslag er interessant.

Varaordførar Hans Inge Myrvold trur òg det er ein lang veg å gå, og at den føreslegne ruta ikkje er noko fylkeskommunen kjem til å driva. «Blandar ein fylkeskommunen inn i ei slik sak, vil ein ikkje koma nokon veg», seier han. Myrvold meiner det må finnast gode løysingar, slik at ruta kan bli realisert. Han ser for seg eit samarbeid med Rødne, som driv ruta frå Rosendal, eller i samarbeid med andre private aktørar som vil laga forretning ut av det. Då kan kommunen vera ein positiv bidragsytar, seier varaordføraren.

Kanskje nokon utanfor det politiske miljøet, til dømes Husnes Vekst, kan ta kontakt med Rødne, og be dei vurdera muligheitene og lønsemda i ei slik rute? Å venta på fylkeskommunen og sjå kva som skjer om fem år, er ei alt for defensiv haldning i ei så viktig sak. Dessutan er det vel alt for optimistisk å tru på draghjelp frå Samarbeidsrådet for Sunnhordland!

 

Lesarbrev av

Kristian Hus

[gravityform id="11" title="true" description="true"]