Russen glitra

«Utan ein raud tråd» hoppa hit og dit slik tittelen lova, men det stoppa aldri 2018-russen i å underhalda.

Håvard Sætrevik

Håvard Sætrevik

haavard@grenda.no

2 desember, 2017

Kjappe sketsjar, rause dansenummer og rikt med songar. Årets russekull leverte ein revy som la lista høgt nok til at ein lett kunne riva, men «Utan ein raud tråd» hadde god klaring til lista.
Russepresident Kristian Enes opna ballet med Kristian Valen-figuren Kjartan, og folk fekk køyrt lattermusklane alt frå første stund.
Det mangla ikkje på gutar og jenter som var trygge på scenen som baud på seg sjølv. Til dømes då Emil Bakke Berntsen sette seg ned med gitaren, og Jarand Naterstad og Kristian Enes stemte med på ein liten hitparade, så var ikkje vokalen alltid like rein, men det var likevel 100 prosent sjarmerande og fekk framifrå respons hos publikum.
Revysjefane Madel Borgen og Brede Grønningen jr. kunne nøgde sjå poeng etter poeng gå inn hos publikum, og revyleiinga skal ha skryt for å ha sketsjar som kom raskt til poenget, sketsjar som både enda overraskande og som hadde gode poeng. Slik var det både for dei obligatoriske lærarsketsjane og for sketsjar dei hadde lånt.
I alt dundra russen gjennom 23 nummer, fordelt på halvannan time med moro. For dei som ikkje fekk med seg premieren, er det råd å nå i framsyninga laurdag ettermiddag. Det er vel verd både tida og pengane.