Røysterett for alle syng jula inn
I anledning sitt 30-års jubileum smell Røysterett for alle til med to julekonsertar heilt på eigen hand.
– Det å halda julekonsert på eigenhand er noko me har drøymt om lenge, men det er også noko som krevjar litt å få til når du skal arrangera det heilt på eigne hender. Men i anledning 30-årsjubileet vårt så fann me ut at om me fyrst skal arrangera det nokon gong, så var det no me skulle gjera det, seier Svein Rimestad frå Røysterett for alle.
Artikkelen held fram under annonsen.
Difor har dei sett av 6. og 13. desember til å gje julestemning til kvinnheringane. Den fyrste konserten går av stabelen i Uskedalen kyrkje, medan den siste vert skipa til i Ølve kyrkje.
– Her vert det stort sett julestoff med meir eller mindre kjente melodiar. Det vert noko godt gamaldags som blant anna «Gledelig jul» og litt nyare som for eksempel Eva Wheel Skram sin «Selmas sang», seier Rimestad.
Med seg har dei som vanleg dirigent Maria Malmsten, som igjen har fått med seg mannen sin og gitarist, Einar Steinkopf og son Fridar Malmsten Steinkopf.
– Me trur det skal bli ei triveleg stund som kan vera kjekk å få med seg, ei avkopling frå den elles så travle julestrida, seier Rimestad.