Rosendal Songlag frir til songglade menn

Marius Tveit Nissestad

Marius Tveit Nissestad

marius@grenda.no

Publisert: 5. september 2020, 08:00

Etter ein lang koronapause er Rosendal Songlag klare for ny sesong 9. september.

Songlaget startar opp med øvingar i Rosendal Samfunnshus onsdag i neste veke. Her har dei god plass til å sikra trygge øvingar med omsyn til smittevern.

– Det er utarbeidd retningslinjer for kor angåande smittevern, og dei skal vi sjølvsagt følgja. Det skal vera trygt å gå på korøving hos oss, skriv Unni Vatne Nedrevåg i Rosendal Songlag i ei pressemelding.

Til den komande sesongen har dei sett opp det dei kallar eit lett og lysteleg repertoar.

– Eit prosjekt vi vonar skal bli ein konsert med musikarar og gjester på vårparten. Det aller meste av repertoaret er nytt for alle, så dette er ei fin tid å starta på for nye songarar. Vi har plass til mange fleire på alle stemmene, og ynskjer oss spesielt fleire songglade menn. Ein kan gjerne vera med på dette konsertprosjektet utan å forplikta seg til meir medlemskap, eller berre vera med på eit par øvingar for å sjå om dette er noko for deg, skriv songlaget.