Ripel Jensen til topps

I helga tok Marius Ripel Jensen frå Husnes sin fyrste siger i NM i klassen Superbike.

NM i Superbike vert arrangert fordelt over fleire helger i løpet av sesongen, og løpet som i helga vart arrangert på den tradisjonsrike banen på Rudskogen, var det andre i rekkja i 2017-sesongen. Løpet Ripel Jensen gjekk til topps i, var eitt av tre løp som var planlagt arrangert under NM-helga.

I løpet som vart avvikla på laurdag, endte husnesingen på ein sterk femte plass.

21 sekunds margin

Det var ruskete vêr som prega sundagens løp, og etter at fleire hadde køyrt ut som følgje av dei vanskelege køyretilhøva, vart det raudflagga og arrangert omstart.

I følge sine eigne nettsider fekk Ripel Jensen ein god start og var fyrst ute av fyrste sving. Avstanden til dei andre førerane berre auka, og til slutt kunne han køyre i mål til sin fyrste siger, 21 sekund føre nummer to.

Det var også planlagt enda eit løp på sundagen. Dette vart avlyst som følgje av at tåka kom sigande, i tillegg til dei allereie regntunge tilhøva.

Neste løp på timeplanen for den friske husnesingen vert NM-helga, 21- 23. juli på Gelleråsen i Karlskoga.