Resultata gjekk i mot – Halsnøy rykker ned
Varegg 2 banka Dale og Vaksdal spelte 0-0 mot Raymond Pedersen sitt Søfteland. Med det er Halsnøy/Trio 2 klare for 6. divisjon.
Etter helgas 5-4-tap heime mot Kvernbit var det framleis ein liten matematisk sjanse for at Halsnøy/Trio 2 kunne berga plassen. Men etter måndagens runde i 5. divisjon avdeling 2, var reknestykket løyst.
Artikkelen held fram under annonsen.
Halsnøy/Trio 2 var der avhengige av at verken Varegg 2 eller Vaksdal klarte å nå 20 poeng, som er det Halsnøy kan få om dei slår Fitjar i helga. Men med ein knusande 10-1 siger over tabelljumbo Dale, klatra Varegg 2 opp på 22 poeng, medan Vaksdal no ligg med 20 poeng etter poengdelinga heime mot Søfteland.
Og sidan Halsnøy/Trio 2 trekte laget til bortekampen mot Radøy/Manger og Vaksdal har stilt til alle kampane sine denne sesongen, hamnar Halsnøy/Trio 2 bak, uavhengig av målforskjell.
Då vil det ikkje hjelpa om både Stord og Tertnes skulle klara å klatra forbi Sogndal 2 på tabellen, som igjen vil føra til at berre to av 10. plassane i 5. divisjon rykker ned. Det betyr at nedrykket til 6. divisjon er eit faktum.