- Vi vil laga noko å koma heim til

Grenda møter deler av styret i Samfundet på Zoom, då Kristoffer sit i Bergen og studerer medan nestleiar Kristin Sletten og medlem Anja Kleven sit heime i Kvinnherad.

– Etter vidaregåande blir ein litt spreidd for vinden, og ein ser ikkje folk så ofte. Det er litt av det vi vil gjera noko med, fortel dei.

Samfundet vart oppretta i fjor vår, fordi Kristoffer ville prøva å knyta og oppretthalda eit sosialt nettverk for unge. Dei er åtte stykke som sit i styret, men sidan dei sit i kvar sin by og bygd har det vore vanskeleg å få dratt i gong så mykje som dei ynskjer. Dei har likevel ingen planar om å gje seg.

– Vi skulle veldig gjerne hatt fleire ressurspersonar med. Anten ein vil bidra med idear, lokale til samling eller tida si til å dra i gong noko, seier Kristoffer, og legg til;

-Vi har jo fått til ein del kjekke arrangement, som hengekøyetur til Bremstølen, volleyball og grilling i Skomakarhagen og nokre andre kveldar, men vi kunne trengt nokon fleire kjernepersonar i Kvinnherad for å få til enno meir.

Koma heim

Samfundet er ein foreining for unge vaksne i 20-åra. Ideen sprang ut av ein lengten etter sosiale aktivitetar under koronatida, og det å ha ein felles omgangskrins.

– Eg såg tilbake på russetida med litt sånn romantiske auge, og Samfundet starta vel som eit forsøk på å gjenskapa det, fortel Kristoffer.

– Ein møter gjerne folk på Festidalen og seier hei og det er god stemning, men så ser ein dei ikkje før neste Festidalen, seier han.

Samfundet har som mål at fleire unge vaksne skal ha noko å gå til, og skapa eit samhald på tvers av bygdene.

– Vi har lyst til at det skal skje litt for dei av oss som er ferdige med VGs. Mange av oss har jo flytta, men kjem heim i helgar og ferier og ein kjem ikkje akkurat heim fordi det er noko som skjer. Vi vil at folk skal ha noko å koma heim til, fortel Anja og legg til;

– Vi vil òg at folk skal bli kjente med oss, vi har lyst å vera opne og skapa eit større samhald for folk på vår alder, for det saknar vi her i Kvinnherad.

Dei tre er einige om at det ikkje er flust av tilbod for unge vaksne som ikkje er etablerte, og seier at alle er velkomne til å vera med i Samfundet, det er heilt gratis og ein er med så mykje eller lite ein vil.

– Eg må berre seie det at det er ei veldig hyggeleg gruppa, og ein blir godt tatt imot om ein har lyst å vera med, avsluttar Anja.