– Veldig bra opning av Mekkegarasjen

– Dette er eit flott prosjekt som oppstod på initiativ frå ungdom ved skulen. Rektor tok kontakt med meg og vi har drøfta ein del med politiet og andre, seier Vigdis Gammelsæther frå ungdomsbasen Nord.

– Det er viktig å ha eit tilbod for alle, òg for dei som likar motorsport. I ungdomsmiljøet er det mykje fart og spenning, så å kunna få opplæring i både mekking og tryggleiken rundt, og samstundes ha ein møteplass er heilt supert, seier ho.

Mekkegarasjen søkte midlar frå Gjensidigestiftinga, og til jul fekk dei seg ei overrasking i form av 300 000,-.

– Det har tatt oss godt og vel seks månadar å få alt på plass, grunna litt forseinkingar og diverse, fortel Gammelsæther

Silvia Tofte, som var den fekk dela ut midlane til Ungdomsbasen Nord, var nøgd med det arbeidet dei har gjort med utforming av tilbodet.

– Dette er kjempegøy! Vi jobbar jo i heile Hordaland, men for meg er det ekstra kjekt med noko lokalt. Vi er opptekne av å ha ein viss breidde på interessefeltet vi støttar, og dette var eit solid prosjekt med mykje driv bak, seier ho.

Ikkje berre for gutar

Marit Dale Guddal vil vera å sjå i garasjen kvar måndag. Ho vil vera med og leda vei for ungdommane, og vonar det vil vera ein plass der ungdom kan vera saman og samstundes læra seg om mekking.

– Eg håpar at ungdommane tykkjer det er kjekt å koma hit, og så håper eg at det kjem jenter! Å mekka er jo nesten litt ein ting for gutar, men eg håpar at terskelen ikkje er så høg for jentene når eg er her, seier ho.

Det er mest dei siste fem åra at Marit har haldt på å mekka, hovudsakleg på bil. Ho har vore interessert i å mekka sidan ho kjøpte sin fyrste bil, ein Audi A4.

– Mamma seier alltid at ein må kunne gjere ting sjølv, og vera litt sjølvstendig. Det har nok hengt seg fast, fordi eg likar å finne utav ting sjølv. Eg har sett ein del videoar på YouTube og lært mykje av kompisar, fortel ho.

Workshop

Då Jon Steinar Vivelid høyrde om mekkegarasjen tok han opp telefonen og sa at han ville vera med.

– Han er mekanikar, aktiv pappa, og rett og slett ein kjempeviktig støttespelar, fortel Gammelsæther.

Vivelid skal ha workshops med ungdommane ca. annankvar veke. Her skal dei få læra korleis ein gjer ting skikkeleg, kva verktøy ein brukar til kva ting, og ein god del om å fiksa sykkelen på ein trygg og god måte.

– Eg vil vera med og leda ungane på riktig veg. Eg har vore MC- mekanikar og drive med det i ein mannsalder. Det er viktig for meg å læra ungane korleis ein gjer ting skikkeleg og ikkje minst å det å tenka sjølv, og å løysa problem på eigenhand, seier han, og legg til;

– All skruing er overførbart, så dette kjem til å koma dei til gode når dei kjøper seg bil òg. Det er rett og slett kunnskap dei vil dra nytte av i lang tid framover.

Positivt for kommunen

Nestleiar i ungdomsrådet, Tord Sverresson Hatteberg, haldt ein flott tale til opninga.

– Mekkegarasjen skal vere ein plass for alle, der ein kan læra av kvarandre. Det er lett for dei som er interessert i sport å finna ein plass å gå til, men for dei som har andre interesser betyr dette mykje, sa han, og la til;

– Det er kjempepositivt at kommunen høyrer på kva ungdommen ynskjer seg. Alle skal ha ein plass å gå til, ein plass å utfordra seg sjølv og å læra, uansett kva interesse dei har.

Til sist takka han Gjensidigestiftinga for at dei har trua på og støttar ungdom i kommunen.

– Eg vil takka for at dykk gir oss sjans til å visa meir praktiske eigenskapar og ikkje berre teoretisk kunnskap.

Mekanikardraum

Trond Christian Skartveit var ein av ungdommane som møtte opp denne måndagen. Han har vore interessert i mekking ein god stund og har lært mykje hos onkelen sin.

– Eg har vore med og skrudd litt på bilen til onkel, han har ein Audi. Då har vi skifta litt akslingar og fiksa litt forskjellig, fortel han.

Å ha ein mekkegarasje der ein kan læra seg forskjellig og holda på med interessa si, synes Trond Christian er topp. Han, som så mange andre, har lyst til å bli bil- eller motorsykkelmekanikar.

– Eg vil søkja meg inn på tipp til neste år. Så må eg vel ut av kommunen for å gå vidare på mekanikk. Det har dei ikkje på Husnes, noko eg synes dei burde med så mange ungdommar som er interessert i det her, seier han.

Ripel’n

Marius Ripel og team var også til stades ved opninga av mekkegarasjen. Ripel hadde med seg sykkelen han vann NM med tidlegare i september.

– Eg har køyrd Kawasaki i 15-16 år, men gjekk over til Yamaha tidlegare i år. Lastebilen vi har med er den vi køyrer Norge rundt med. Den bur vi i, lagar mat i og har verkstad i, fortel Marius.

Han får utdelt ein boks med sjokolade og ein teikning som ein av ungdommane har teikna av han på motorsykkelen. Han blir litt brydd, men tydeleg glad for gåva.

– Kva tykkjer du om garasjen vår då?, spør Vigdis.

– Den er kjempefin! Mykje finare enn min!, smiler Marius.

Fleirbruk

Mekkegarasjen vil vere ein plass for alle unge i Kvinnherad, frå ungdomsskulen og Vidaregåande.

– Vi vil ha ein inkluderande arena, der dei som ikkje kan skru òg føler seg velkomne og at dei får læra av dei som kan, seier Gammelsæther.

Ho har eit håp om at garasjen kan benyttas i undervisninga i tillegg, anten som valfag eller liknande.

– Vi meiner at fleirbruk er eit viktig prinsipp og at det som blir set i gong skal kunna nyttast av fleire, seier ho og legg til;

– Her er det berre ungdommane sin fantasi som set stoppar for kva ein kan få til. Dette kan vere både elevbedrift, samarbeid med sporten, arrangement over heile dagar og mykje anna. Det ligg litt i hendene til elevane.

Elevane har vore med og diskutert mykje og kome med innspel om korleis dei vil ha det. Alt av verktøy og utstyr er kjøpt inn nytt, både arbeidsbenkar, kompressor, stativ for tråsyklar og stativ for motorsykkel som kan hevast og senkast.

Må få lov av pappa

Jon Andreas Hjelmeland frå Omvikdalen tykkjer det er gøy at det er kome mekkegarasje i Rosendal. Han har tidlegare skrudd litt på krossarar og mopedar.

– Eg kjem nok til å vera her mange gonger framover ja!, seier han, og legg til;

– Det var ein veldig bra opning, og eg likte sykkelen til Marius.

– Skal du ha deg ein sånn du og?

Jon Andreas dreg litt på det og smilar.

– Jaaa, eg må kanskje få lov av pappa fyrst.

Då opninga var over gjekk ungdommane bort på basen, kor Fonna Næringspark stilte med gratis pizza og Baroniet stilte med gratis brus.

– Fonna sa «sjølvsagt skal vi støtta», det er kjekt. Det har vore veldig positive tilbakemeldingar allereie og mykje god støtte!, seier Gammelsæther klart nøgd.