Spente førsteklassingar på Halsnøy
– Me skal læra å sitja på pulten, ropar Louisa Svåsand Isdal mens ho hoppar og sprett og svingar seg i leikestativet på Halsnøy skule.
Dei 20 førsteklassingane er på veg inn i klasserommet når Grenda stikk innom ein tur. Me spør ungane kva dei gler seg til å læra. I tillegg til å sitja ved pulten, blir lesing og teikning nemnt som kjekke læremål for året.
– Er sekken din tung, Nora? spør kontaktlærar Mari Øvrevik Rydland.
Annonse
– Tenk kor tung den blir når du får bøker oppi!
– Då kjem du til å gå sånn, ler pappen til Nora og bøyer ryggen langt bakover. Førsteklassingen fniser oppglødd, før ho ruslar inn i klasserommet ilag med dei andre.
Glade og spente fjes fyller klasserommet, og alle ungane har fått ei rose under opninga i starten av dagen. Den andre kontaktlæraren, Elisabeth Hansen Eide, klappar i hendene, og dei ferske skuleelevane gjentek rytmen med sine eigne hender.
– Så flott! Hugsar de kva me skulle gjera etter me har klappa? spør læraren, som alt har øvd på dette med ungane før sommaren.
Annonse
– Me skal vera stille, kjem det frå ein av pultane.
Nedteljing av dagar
Stolte foreldre står langs veggane og følgjer med. Ei mor fortel oss korleis sommaren har vore for 6-åringen:
– Ho har venta og venta i heile sommar. Skulesekken vart kjøpt inn alt før ferien, og det har vore nedteljing av dagar sidan då.
Etter besøket vårt, spør me Mari Øvrevik Rydland om korleis ho syns det gjekk med dei nye førsteklassingane:
– Det gjekk veldig fint. Dei virkar trygge alt no, det var ikkje noko problem då foreldra forlet klasserommet. Det er glade og kjekke ungar, så dette blir bra!, seier ho.
