Slår eit slag for berekraft

Heile Noregs bygdekvinnelag markerte frivilligheitas år i oktober, med tema «saman for berekraftig matkunnskap». Lokallaga hadde aktivitetar som retta merksemd mot matkultur og inkludering og mangfald for framtida.

Omvikdalen bygdekvinnelag fekk denne kvelden besøk av Sosan Asgari Mollestad, som er rådgjevar for mangfald og inkludering i Noregs bygdekvinnelag.

– Eg hadde gleda av å vitja Omvikdalen og halde eit innlegg om kor viktig frivilligheitas rolle er når det kjem til å inkludera våre nye landsmenn, fortel Asgari Mollestad i ein mail til Grenda og legg til;

– Frivilligheita er limet i samfunnet vårt. Den knyt menneskjer, gode tankar og handlingar saman. Frivilligheita byggjer fellesskap og er ein god medisin mot utanforskap og einsemd.

Asgari Mollestad kom sjølv til Noreg i 1985 som flyktning frå Iran og måtte navigera den nye kulturen på eigenhand. Denne tysdagen fortalde ho om prosjektet «kvinner ut – meistring og kompetanse», som er eit prosjekt der bygdekvinnelaga vil bidra til å styrka minoritetskvinners kompetanse og dermed bidra til å inkludera, auka deltaking i samfunnet og skapa betre høve for sysselsetting.

Ho fortel òg om eit felles ansvar for å skapa møteplassar, aktivitetar og lokalt engasjement, og at lokallaga står for alle aktivitetane og det gode frivillige arbeidet i lokalsamfunnet.

– Vi i Noregs Bygdekvinnelag er særs stolte av våre bygdekvinner og deira engasjement for bygda, skriv ho.

Berekraftig matkunnskap

Berekraft er eit viktig tema for Noregs Bygdekvinnelag. I eit lesarinnlegg om Vår Dag skriv dei at ein tredjedel av maten som vert produsert i verda ikkje blir eten opp, og at i Noreg står hushaldningane for halvparten av matsvinnet. Denne utviklinga vil dei snu.

Kjersti Hjelmeland fortalde om berekraft og kortreist mat, og om det å vere medviten om vala ein gjer i til dømes matbutikken. Ho snakka òg om problemstillingar rundt den korte vekstsesongen i Noreg og om myndigheitene sitt mål om å auke det plantebaserte kosthald i Noreg.

Birgit Hjelmeland, som driv «Baketunet» på garden på Hjelmeland heldt så foredrag om berekraft og tradisjonsmat. I høve praten om tradisjonsmat, berekraft og mangfald og inkludering, fekk ein smaka på ein fantastisk variasjon av matrettar frå ikkje berre Noreg, men også Brasil, Colombia og Syria.

Sônia Brito Hjelmeland, Iara Da Silva Sá, Yossira Gjuvsland og Rasha Aarai, som alle er kvinner med innvandrarbakgrunn, hadde laga nydeleg mat til oss frå sine heimland, skriv Irene Hjelmeland Haavik i ein rapport til bygdekvinnelaget.

– Det var god stemning og gode innlegg, mangfaldig servering med matretter frå ulike hjørne i verda og mange engasjerte bygdekvinner, skriv Asgari Mollestad.

– Det var ein kjekk kveld med bra oppmøte, avsluttar Haavik.