Nyoppussa trimrom i Uskedalen

Den 21.september opna Uskedalen Aktivitetshus AS endeleg opp dørene til eit flott nyoppussa trimrom.

– Det er ikkje så stort, men vi føler vi kan gi eit godt tilbod til folk likevel. Vi har fått ein del tips frå folk som driv med trening om det som trengs for ein god trening, seier styremedlem Per Korsvold.

Trimrommet i Uskedalen vil ikkje konkurrera med til dømes TrimX på Husnes, men vera eit lågterskel tilbod til bygdefolket, også dei som ikkje bur i Uskedalen.

– Vi meiner jo at dette er verdifullt for bygda, for mange er det uaktuelt å køyra til Husnes på grunn av forskjellige utfordringar. Her kan ein køyra ungane på fotballtrening og i staden for å køyra heim igjen og venta på å henta kan ein gå inn her og ta seg ei økt, seier Korsvold.

Ein viss standard

Trimrommet har vore stengt i sommar, for ein sårt trengt oppussing. Korsvold vil retta ein stor takk til Dugnadsgjengen, som har jobba på for å pussa opp trimrommet.

– Vi har søkt ein del midlar og fått avslag, men med god hjelp frå dugnadsgjengen har vi har lagt nytt golv, malt veggar og piffa det opp litt. Dei fikser og vaskar og måler. Vi hadde ikkje klart oss utan dei, dei har heva standarden på bygget monaleg, fortel Korsvold, og legg til;

– Dette er jo ein privat hall som er bygd på dugnad. Det er jo teknisk sett eit AS som driv her, men det er frivillig arbeid og vart drive på dugnad. Vi skal ikkje ha profitt, men vi må ha pengar nok til at det går rundt, seier Korsvold.

Heidra dugnadsgjengen med kake

Tredemølla på trimrommet fungerer, men syng på siste verset. Men med mykje nytt utstyr og fine grøne veggar ser da riktig så innbydande ut å ta seg ei treningsøkt.

– Det er viktig at vi har ein viss standard her. Viss det ser stygt ut er det lettare for folk å ikkje rydda og vaska etter seg. No har vi fått da såpass at vi trur folk vil koma og ta glede i det.

Trimrommet vil vera ope heile døgnet for kundane, og alle medlemmar får kvar si brikke til å låsa seg inn med.