MS «Gann» vitja Rosendal
Torsdag 1. september låg skuleskipet «Gann» til kai i Rosendal. Om bord var fire kvinnheringar som alle er einige om at det er ein veldig spesiell og bra plass å gå på skule.
Publisert
«Gann» kom til Rosendal som del av sitt «bli kjent- tokt», som dei brukar ha på starten av skuleåret. Dei ligg til vanleg ankra opp på Hundvåg i Stavanger, men har mellom 50-60 seglingsdøgn i året.
Då Grenda var innom hadde elevane vore om bord i to veker. Denne dagen hadde dei eit opplegg, og var spreidd for alle vinder. Då arrangementskoordinator Åsmund Johansen sendte dei frå Kvinnherad ei tekstmelding kom dei slentrande ein etter ein.
Annonse
Gode metodar for læring
Sigve Haukenes frå Varaldsøy har sitt andre år på «Gann». Det finnest fleire grunnar til at han valde å søkja seg inn på skuleskipet, men mest av alt ville han prøva noko nytt.
– Eg har lyst å jobba på sjøen, så dette verka som ein perfekt start, seier han, og legg til;
– Måten ein lærer på om bord er veldig fin, ein får gå vaktar og det er meir praktisk arbeid. Vi har jo ein del teori òg, men så får ein gå i gong med å utføra det i praksis etterpå, og det lærer eg betre av.
Annonse
Sigve tykkjer at det er eit ganske spesielt samhald om bord i skuleskipet. Kan henda det har noko med at elevane jobbar vaktar både på bru og gangveg, og dei går brannrundar og har kjøkenteneste.
– Ein kjem tett på folk, og ein er aldri aleine, det er veldig positivt. Og så lærer vi enormt mykje forskjellig, fortel Sigve, som kan tenka seg å bli styrmann.
Får sett mykje
Trym Svellingen Hammer frå Husnes hadde nett starta på første året på elektro om bord på skipet.
– Eg visste ikkje heilt kva vidaregåande eg ville vela. Ein dag var ein lærar frå «Gann» innom timen og snakka om skipet, og så såg eg ein del videoar på YouTube. Det verka veldig bra, og eg tenkte «kvifor ikkje?».
Trym vart såpass inspirert av denne læraren at han valte å dra på hospitering då «Gann» låg på Stord. Han er veldig nøgd med valet sitt, og gler seg til å læra og oppleva litt andre ting enn den vanlege vidaregåande-elev.
Annonse
– Og så gler eg meg veldig til vintertokt i Nord-Norge!, seier han.
Elevane skal segla fleire stader i løpet av året, mellom anna ein tur til austlandet, eit vestlandstokt og nokre rekrutteringsturar. Til våren blir det utanlandstur, noko andreklassingen Sigve har fått vera med på ein gong før.
– Vi var i Rotterdam, og det var heilt supert. Vi låg veldig sentralt, og det er ein veldig stor hamn, difor var det ekstra kjekt sidan det var så mykje å utforska, seier han.
Kjekke elevar
Åsmund Johansen har jobba om bord på skuleskipet i ti år og har hatt over 1000 elevar. I haust var det mindre enn halvparten som søkte som kom inn. Om bord i år har dei 100 gutar og 35 jenter.
– Det er ny rekord, seier Johansen, og legg til;
Annonse
– Det er bra med litt fleire jenter om bord, det gjer ein del med miljøet. Det blir ikkje sånn gutta-stemning.
Dei fleste andre vidaregåande skuler har ein fullførelses-ratio på 60-70%. Om bord på skuleskipet «Gann» ligg talet på 98 %.
– Når ein vel ein sånn skule så veit ein kanskje litt meir kva ein vil. Alle lærarar seier at «vi har så kjekke elevar», men vi om bord på «Gann» meiner det verkeleg. Vi er privilegerte som har så dedikerte elevar, seier han.
– og lærarar, skyt Trym inn med eit glis i retning Johansen.
