Maud skal eit år på folkehøgskule; - Eg gler meg til å få nye vener!

Til vanleg bur Maud ved Villatunet på Husnes. Der har ho eiga leilegheit i tilknyting til bufellesskapet, som også husar ni andre bebuarar. Her trivst ho veldig godt, og her har ho mange vener, samt tilsette som ho er nært knytta til.

Grenda besøker Maud heime i leilegheita, saman med mamma Kari og pappa Asbjørn Sivertsen.

Maud er ei svært sosial ung dame som er glad i folk, og ifølgje mamma Kari er dette den viktigaste drivkrafta for ønsket om å gå på folkehøgskule.

– Då me var på intervju ved skulen, og Maud vart spurt om kvifor ho ville gå på folkehøgskule, svara ho...

– At eg vil ha nye vener! fullfører Maud raskt setningen!

Dette var tydelegvis eit godt svar, og Maud fekk snart etter intervjuet tilbod om studieplass ved folkehøgskulen.

Frå usikkerhet til overtyding

Sjølv om både mor og far gler seg over det komande eventyret til Maud, må dei også vedgå at det er ein skrekkblanda fryd. Dottera er avhengig av å ha folk rundt seg, og sjølv bur dei berre 15 minutt unna og kan ta turen på besøk kortid som helst.

– Då me køyrde nedover til Jæren for å ha intervjuet, tenkte eg med meg sjølv; kva er det me tenkjer på? seier Kari.

– Men då me kom ned og såg staden, trefte dei tilsette og fekk omvising på skulen, var eg ikkje i tvil lengre: Dette må Maud få oppleva! Eg kjende på ei overbevising om at me hadde gjort det rette, sluttar Kari, og får nikkande samtykke frå Asbjørn.

Maud sjølv gjev ikkje uttrykk for anna enn glede og forventing. Så er også dette noko ho har hatt lyst til lenge. Ho fekk høyra om folkehøgskulen av ei av dei tilsette ved Villatunet, som har ei søster som jobbar ved Jæren Folkehøgskule.

Maud har i tillegg lese på heimesidene til skulen, og til og med lært seg namna på dei tilsette der!

– Ja, då me var på folkehøgskulen hugsa Maud namna på dei som jobbar der, ho har ein utruleg hukommelse for namn og andlet, fortel Kari leande.

Tilrettelagt linje

Jæren Folkehøgskule byr på mange ulike linjer, og linja Maud skal gå på heiter som nemnt "Bo og fritid". Denne linja er tilrettelagt for unge med psykisk utviklingshemming eller lærevanskar, og som treng litt hjelp i kvardagen.

I løpet av skuleåret skal elevane læra å bli meir sjølvstendige og trena på å bu for seg sjølve. Samstundes handlar eit folkehøgskuleår om å læra å leva saman med mange andre.

Skulen har 80 elevar, som er fordelte over tre internatbygg. I eitt av desse skal Maud bu, på tomannsrom saman med ei av dei andre jentene på linja hennar.

– Ein av tinga dei skal læra seg, er å stå opp sjølve, dusja og kle seg og vera på plass til frukosten som er i åttetida om morgonen, fortel Kari.

– Då må du ha med deg vekkarklokka di, seier Asbjørn.

--Ja! svarar Maud entusiastisk.

Det viser seg rett nok snart at Maud er vant med å stå opp tidleg. Kvar vekedag tek ho nemleg bussen til Herøysund tidleg om morgonen.

– Då går eg på jobb, seier Maud.

Ho siktar til dagsenteret, der ho er med på ulike aktivitetar gjennom heile veka. Ho lagar blant anna tennbrikettar av avispapir, som vert rulla og dyppa i flytande talg. Og så er ho med og kløyver ved.

– Ho likar veldig godt å jobba med ved, skyt Asbjørn inn, noko Maud nikkar bekreftande til.

På folkehøgskulen skal elevane elles læra hushaldssyslar som reinhald, matlaging og klesvask. Ettersom Maud har eigen leilegheit, er ho slett ikkje ukjend med desse oppgåvene.

– Ho vaskar klede sjølv, og lagar middag med hjelp av dei tilsette. Noko som blir uvant på folkehøgskulen, er fellessmåltida. Her må ein møta til alle måltid i matsalen, seier Kari.

I tillegg til oppgåver knytta til hushald, skal elevane ved linja også øva på å bli meir sjølvstendige utanfor heimen. Dei skal til dømes øva på det å ta offentleg transport, samt å læra om pengebruk, mellom anna ved å bruka eige visakort.

Friluftsliv og turar

Forutan undervisinga ved linja, står friluftsliv sterkt ved skulen. Dei brukar naturen masse, skulen har kajakkar, og Borestranda ligg like ved.

– Likar du å vera ute og gå på turar? spør me Maud.

– Ja, det er kjekt, svarar ho.

Pappa legg til at ho har gått på Speidaren tidlegare, og har vore mykje ute i naturen.

Det er også to utanlandsturar ved skulen, ein om hausten og ein om våren, forutan småturar i nærområdet.

– Då me kom på besøk i samband med intervjuet, hadde dei nett komt tilbake frå utanlandstur, og heldt på å laga minnebøker etter turen, seier Kari.

Ettersom linja heiter "Bo og fritid" seier det seg sjølv at det også vert fokusert på fritida. Elevane skal læra å klara seg mest mogleg sjølve på ettermiddagane, og fylla dagane med meiningsfulle aktivitetar utanfor skuletida.

Og det er nok å velja mellom. Ein kan vera med på volleyball, bingo, strikke-cafe og å syngja i kor, for å nemna berre nokre få av dei kjekke tinga ein kan ta del i.

The Voice

– Kva gler du deg mest til? spør me, og tenkjer på skulen.

– The Voice! svarar Maud strålande.

Kari og Asbjørn forklarar leande at Maud er så glad i The Voice, og at ho øver til å vera med der.

– Ja, eg øver på å synga til The Voice, stadfestar Maud ivrig.

Ho har attpåtil forsterkar og mikrofon som ho brukar når ho syng. Med dette utstyret underheld ho også dei andre på Villatunet ved passande høve.

– Kan me få høyra ein song?

Då er ikkje Maud sein om å setja på forsterkaren, og når ho tek mikrofonen og byrjar å synga, så er det tydeleg at ho er i sitt rette element! Ho strålar der ho står, og framstår som den fødde enterteinar!

Me må jo berre håpa på at dei andre elevane ved folkehøgskulen også får oppleva enterteinar-sjela til Maud! Kan hende når hennar linje skal laga til elevkveld?

– Ja, eg har jo høyrt deg synga før, på 17. mai ein gong, må journalisten innrømma.

– Ja, 17. mai, ja! utbryt Kari, og fortel;

– Det hende ved kyrkja for nokre år sidan. Då mikrofonen vart ledig eit sekund, mellom talen og overrekkinga av blomar, såg Maud sitt snitt, og sprang fram og tok ordet! Då banka hjarta mitt kan du tru! seier Kari, hovudrystande ved minnet.

– Heldigvis gratulerte ho berre alle med dagen, og song ein fin liten song, så det gjekk jo bra! ler ho.

Maud er altså veldig glad i å synga. Ho finn fram ein perm der ho har samla ark med songar som ho har skrive ned frå YouTube. Det er mellom anna songar frå ulike Disney-filmar, og her tronar nok filmane Frost og Encanto høgast.

Maud elskar å gå på kino.

– Eg gler meg til mai, då kjem "Den Lille Havfruen" på kino. Og i april kjem "Super Mario Bros", seier Maud, og demonstrerer full oversikt over komande kinofilmar.

Heldigvis kan ho sjå fram til å fortsetja med å gå på kino også på folkehøgskulen. Dei har nemleg både kino-, teater- og museumsbesøk med på programmet!

Ei oppleving for livet

Det blir ei stor endring i dagleglivet til både Maud, mamma og pappa når ho reiser. I frå å kunna treffast ofte i kvardagen, og fast annakvar helg, skal Maud tilbringa også dei fleste helger på skulen.

– Det er berre to heimreisehelger, utanom feriane. Dette fordi skulen ynskjer at elevane skal vera mest mogleg til stades i helgane, fordi det skjer så mykje sosialt då, seier Kari.

Det blir nok ein del sakn av kvarandre.

– Og så kjem ho til å sakna dei andre på Villatunet. Heldigvis kjem ho jo tilbake dit etterpå. Me vil fortsetja å betala for leilegheita medan ho er vekke, for å sikra at ho får fortsetja å bu her når ho kjem heim, seier Asbjørn.

– Det blir sikkert ein del telefonar fram og tilbake, ja. Maud kjem nok til å ringa både oss og dei andre på Villatunet, for å høyra at det går bra med alle. Ho har veldig omsorg for dei rundt seg, smiler Kari.

Det er ingen tvil om at både Maud og foreldra er spente på det komande skuleåret. Det er heller ingen tvil om at alle tre ser på folkehøgskule-året til Maud som ei oppleving for livet.

I tillegg til ønsket om å få nye vener, kjem Maud med ei lita avsløring på tampen av intervjuet:

- Eg vil ha kjærast!

- Ja, det er heilt naturleg å ønska seg kjærast, svarar mamma Kari på det.

Og kva er vel meir naturleg for ei ung jente på snart 24 år, enn å ønska seg ein kjærast?