Lagar julekuler med motiv frå Kvinnherad

I fjor var motivet Melderskin, som sett frå Hatlestrand. I år står Bondhusvatnet for tur.

– Eg hadde ein idé om å stå inne i Bondhusdalen og sela kulene i sommar, men dei kom ikkje tidsnok, fortel Sissel.

Ei fyrste kule

Då Sissel var lita fekk ho si fyrste handmalte julekule hos faren. Den har fylgt ho store deler av livet heilt til det var eit lite uhell i heimen.

– Ungane min får lov å ha eit lite juletre på romma sine, og i jula 2020 fekk gutungen lov til å ha mi gamle julekula på treet sitt og så var vi litt uheldige når vi skulle ta det ned og den gjekk i golvet og knuste, fortel ho.

Etter ei stund tenkte Sissel at ho skulle sjå om ho fekk tak i ei ny kula, og byrja søket etter ei på internett. Ho fann ikkje den same som vart knust, men ho kom over fleire stader som hadde eigne julekuler med stadnamn på, og då byrja idéen om Kvinnheradkulo å komma.

– Eg fekk kontakt med ein i Haugesund som heiter Kurt Misje. Han er ein sånn mellommann med julekuler i Haugalandet. Så eg tok kontakt med han og høyrde med han om det var mogleg å få til. Han svara at alt er mogleg om du stillar med motiv og idear, seier ho.

Eit samarbeid vart til

Minsteopplaget Sissel kunne bestilla var på 300 kuler. Ho såg ikkje heilt for seg korleis ho skulle få bruk for så mange julekuler av same sorten, men la det likevel ikkje frå seg.

– Eg vart litt tent på idéen, og tenkte at Kvinnherad har jo ikkje noko sånt, men vi har så mange fine plassar å visa fram. Så då bestemte eg berre at ja, vi lagar Kvinnheradkulo, ler Sissel, og legg til;

– Melderskin var ein naturlig start. Det er jo eit midtpunkt i kommunen, både frå Mauranger og Husnes-sida, men òg frå Hatlestrand og Ølve. Så motivet vart Melderskin som sett frå Hatlestrand, som i mine auge er den finaste sida av fjellet.

Sissel tok idéen med seg til Kvinnherad Turlag, som slo til med ein gong. Det har vist seg å vera eit knakande bra samarbeid.

– Vi bestilte 300 kuler i fjor, men dei fauk unna så vi måtte bestilla 200 til. I år bestilte vi 500, og har allereie seld 100 stykk, fortel Sissel.

Handlaga og unik

Kulene blir laga av kunststudentar ved eit universitet i Kina. Dei handmalar innsida av kula med ein bitteliten pensel med knekk, og kvar kule er unik. Sissel er den som avgjer korleis dei skal sjå ut, og alle detaljer skal vere heilt rett.

– Eg brukar mykje tid på å utforma korleis dei. Eg er litt pirkete, skrifta må ikkje vera så svart, den må vere meir sentrert, eg vil ha årstalet under teksten, litt meir snø. Det er ein veldig kreativ prosess, seier ho.

Sissel ser ikkje for seg å gje seg med det fyrste, og har idear til fleire år framover. Ho vil visa fram motiv frå heile kommunen, høgt og lavt og ytst og inst. Ho håper at i åra framover får dei visa ein kombinasjon av historiske bygg, fjell og vatten, rett og slett visa Kvinnherad for det Kvinnherad er.

– No har vi jo hatt to år, då er det jo tradisjon?, smilar ho, og legg til;

– Det er gjerne litt sånn at folk tenkjer «no må vi få den, no må vi få den», men ein må berre smøra seg med tolmod fordi det blir berre ei i året.