Lærte å spikka båtar, smørknivar og sprettertar

Gamle kunstar vart overleverte til neste generasjon under det kjekke spikkekurset på Rødtunet.

Nokre timar laurdag ettermiddag var Rødtunet ved Uskedalen staden å vera for små og store. Då inviterte nemleg Barnas Turlag i Kvinnherad Turlag til spikkekurs, fyrst og fremst for ungar i alderen 6 til 13 år.

«Har du lyst til å spikka og laga ting i tre? På kurset vil det vera mogleg å spikka leiker, for eksempel sprettert til å sprekka ballongar med, smørekniv, propellbåt til leik i bekken, knaggar og eigne fantasifigurar. Lær deg å laga nyttige og unyttige ting i tre. Du vil læra om sikker bruk av kniv, sag og øks», lokka Barnas Turlag på førehand.

Dei om lag 35 som tok turen, vart møtt av det blide trekløveret Leif, Ingrid Helene og Ingrid Margrete.

– Min jobb er å få ballongane til å sprekka med erter. Men det går ikkje, vi må bruka stein, forklarte Leif og peikte på ballongane som hang på stabbursveggen.

– Og så serverer vi saft, la Ingrid Margrete til, og var snill og skjenka ein kopp til bladfyken.

Nokre meter vidare fann vi brørne Marcus og Anton Ousdal frå Omvikdalen. Dei hadde laga kvar sine fryktinngytande sverd, og demonstrerte ein skikkeleg sverdkamp. Heldigvis vart ingen av dei skadde.

Kjempebra tilbod

Gunhild Enes-Slettebakken hadde spikka både ein sprettert og ein seglbåt. Båten hadde til og med eit stort segl, dekorert med raude hjarta. Runar Myklebust frå Uskedalen hadde med seg sonen Per Olav og nevøen Håvard på spikkekurset.

– Vi lagar smørknivar, opplyste Runar.

– Nei, nei, knivar, korrigerte Per Olav, som ikkje likte ordet «smør».

– Eg lagar ein mann, fortalde Håvard, og viste fram ein imponerande flott trefigur.

Uansett kva dei laga, så var alle samde om at det var eit kjekt arrangement. Det kunne også Reidar Algerøy, som var der saman med det snart sju år gamle barnebarnet Aron Attramadal, skriva under på.

– Dette er eit kjempebra tilbod. Eg såg omtalen i Grenda, og då tenkte eg på han guten her med ein gong, smilte Reidar.

Han hugsa sjølv attende til sin eigen barndom og kor kjekt det var å spikka ting.

– Eg vaks opp utan leikebutikk, og måtte laga leikene mine sjølv. Eg tjuvlånte verktøy av far min. Kvar månad laga eg ein ny båt, humra den opphavlege havstrilen.

Propell

Roland Gestättner frå Høylandsbygd hadde med seg barna Lili og Rozi til Rødtunet. Medan sistnemnde jobba med ein sprettert, hadde Lili fått seg ein fin seglbåt.

– Den har også propell, slik at den kan brukast når det er vindstille, forklarte Roland.

For Barnas Turlag var det ekstra kjekt at dei endeleg fekk gjennomført eit arrangement igjen.

– Vi har sett opp to turar før i år, men begge vart avlyste. Vi får håpa på fleire turar framover, fortalde leiar Siv Framnes.

Også ho registrerte at deltakarane koste seg.

– Ein tyr lett til data og mobil i våre dagar, men det er godt å bruka nevane i blant, slo ho fast.