Korleis er kommunen bygd opp?
Lurer du på korleis Kvinnherad kommune eigentleg er bygd opp og kva kommunen som organisasjon jobbar med? I denne artikkelserien vil vi forsøka å koma med nokre svar. Vi byrjar med oppbygginga av kommuneadministrasjonen.
Publisert
Store norske leksikon definerer ein kommune som «eit geografisk avgrensa område eller fellesskap som nyt ein viss grad av sjølvstende». I Noreg har vi 356 kommunar, og dei fleste blir styrt etter formannskapsprinsippet.
Kvinnherad kommune er blant dei som følgjer formannskapsprinsippet, det vil seie at vi har eit formannsskap og eit kommunestyre. Formannsskapet er eit styre som førebur sakar for kommunestyret, men dei har òg eit visst vedtaksmynde. Formannsskapet i Kvinnherad har ni medlemmar, og desse skal ha hovudfokus på utvikling av kommunen.
Annonse
Kommunestyret er det øvste styrande organet i kommunen, og er dei som gjer endelege vedtak. Kommunestyret i Kvinnherad kommune har delegert mynde til formannsskapet, utvala og kommunedirektør. I Kvinnherad sit det 35 stykke i kommunestyret som ifølge kommunen si nettside har «ansvar for ei heilskapleg styring og prioritering av kommunen sine tenester, oppgåver og ressursar, og er ein arena for levande politisk debatt og diskusjon om aktuelle spørsmål».
Organisasjonsplan
I likskap med andre bedrifter må kvar kommune ha ei organisasjonsplan som skal visa kva kommunen er oppteken av og kva dei jobbar for. I organisasjonsplanen til Kvinnherad kommune kan vi lesa at målsetjinga for organisasjonen er «Saman om utvikling og gode tenester».
Vidare står det at Kvinnherad kommune har fira verdiar og desse er; Respekt, Omsorg, Tydeleg og Ærleg. Verdiane skal styra utøving av arbeidet i kommunen og samhandlinga mellom dei tilsette.
Annonse
Det finnest også ei kommunelov som har som formål å til dømes leggja til rette for at kommunar kan yta tenester og driva samfunnsutvikling til beste for innbyggjarane.
Administrasjon
Å administrera betyr å leda eller forvalta. Administrasjonen i ein organisasjon jobbar både med organisasjonen sitt hovudmål og dei støttefunksjonar ein treng for å styra og halda drifta ved like. I Kvinnherad har vi ei kommuneadministrasjon som gjer nettopp dette.
Øvst i kommuneadministrasjonen finn vi Kommunedirektøren. Hen er leiar for alle som jobbar i administrasjonen. Under der har vi administrasjonsleiar. Neste ledd er leiarar for kvar sektor i kommunen, altså sektor for Teknikk og miljø, sektor for Omsorg, helse og sosial, sektor for Oppvekst, sektor for Samfunnsutvikling og ikkje minst sektor for Økonomi.
