God stemning på Valen skule
– Her er jo skikkeleg positiv energi! Det er veldig kjekke ungar, så dette går over all forventning, seier ein glad kontaktlærar, Mona Hellevik, på første skuledag i klasserommet sitt på Valen skule.
Førsteklassingane sit og jobbar i eit arbeidshefte når Grenda si utsending får koma inn. Og det er verkeleg god og trygg stemning i rommet. Kasper Nausttveit Holmedal har gledd seg mykje til å starta på skulen.
– Eg kan alt nokre bokstavar, for eksempel K, A og O. Og så kan eg litt engelsk, kan han fortelja.
Annonse
Alle vil visa fram nye penal og skulesekkar, og det er tydeleg stas å vera skuleelev. Dei virkar ikkje spesielt nervøse for den nye kvardagen.
– Eg har mange venner og ein storebror her på skulen, så det går bra, seier Filip Holmedal Brede.
Nærmar seg samanslåing
Det er 15 førsteklassingar på Valen i år. Rektor Frode Gaasdal fortel at det er fleire ungar frå Skarveland sin skulekrins som foreldra sender til Valen skule, i påvente av skulesamanslåinga til neste år.
Annonse
– Me ynskjer velkomen elevar frå eit nokså stort geografisk område no, og har blitt ein stor skule, med 27 tilsette og 135 elevar.
I klasserommet er det ein elev som rettar opp handa og spør om å få gå på do.
– Skal eg fylgja deg?, spør lærar Bjarnhild Lygre Sjo.
– Neidå, eg veit kor det er, forsikrar eleven kjekt, og går ut.
