Familie-akedag på Ask Gard

Terje Ask og Solgunn Lyhammer Ask har også tidlegare arrangert akedagar på garden, og denne helga var det ein sjølvsagt aktivitet for dei.

– Me har så god bakke her, så den må brukast til aking. Eg får ikkje lov av ungane til å måka denne bakken, så her må ein gå 70-80 meter opp når det er snø, ein kjem ikkje opp med bilen, ler Terje Ask.

Kona til Terje, Solgunn Lyhammer Ask er aktiv i fritidsklubben i Ølve, så arrangementet var eit samarbeid mellom klubben og garden.

– Fritidsklubben sponsa pølser til alle, og me stilte med bålpanner, fortel Terje Ask.

Terje sytte også for å måka parkeringsplass til alle bilane, og det var ikkje få som ville vera med på å aka.

– Det var fleire som talde, og me kom til mellom 80 og 90 personar som var her og kosa seg. Det starta klokka to, og det var folk her heilt til i sekstida, seier han.

Det var ikkje berre ungar å sjå i akebakken. Mange vaksne nytta også høvet til å få litt fart på kroppen.

– Ho Johanna, doktoren på Varaldsøy, var kanskje den som fekk best fart. Eg veit ikkje kor mange turar ho hadde opp og ned bakken, men ho var i alle fall svært tilfreds! Me var litt uroa, sidan ho trass alt var den av oss med best førstehjelpskunnskap, så me ville ikkje det skulle skje ho noko, ler Terje over telefonen.

Men tryggleiken var også teke vare på denne dagen. Vakter stod langs løypa og ropte varsel når det kom folk i full fart nedover. I tillegg hadde Terje laga til ein eigen sti attmed akebakken der ein skulle gå opp, så risikoen for kollisjonar ikkje skulle vera for stor.

Fritidsklubben hadde til og med kjøpt inn akematter, og elles stilte folk med rattkjelkar og akebrett. Foreldra til Terje og Solgunn stod ved bålpannene og grilla pølser, så ein ikkje skulle gå tom for energi. Folk sette stor pris på arrangementet.

– Ja, det er jo litt arbeid med det, men veldig kjekt, og så får me mange takkemeldingar etterpå, og det verka som folk syns det var eit flott tiltak, avsluttar Terje Ask.