Eit solid løft for Sandvoll og Utåker

– Vi vonar at alt grunnarbeidet, og rulleskiløypa på 550 meter står klart seks månader etter byggestart. Så kjem kunstgrasdekket til fotballbanen til sommaren, og klatreparken skal bli bygd i løpet av sommaren, seier styremedlem i IL Ternen Kenneth Eide.

Heilt til slutt vil dei òg laga ein leikeplass på baksida av skulen, og det blir ny og flott parkeringsplass utanfor skulen.

– Då løyser vi og eit problem som skulen har – manglande parkering. Når det er arrangement her må vi jo per dags dato vera kreative, ikkje minst den daglege drifta av skulen, lærarane har jo berre to-tre plasser å parkera på, fortel Kenneth.

Ein identitet for bygdene

Erslandsparken vil bidra til at ein kan halda fritidsaktivitetar på Sandvoll, og det gjer det enklare for dei som bur på Sandvoll og Utåker. Då slepp dei å køyra kommunen rundt for til dømes å spela fotball.

– Kjernetida på dei fleste fotballbaner i kommunen er opptekne, så det er vanskeleg for oss å få lånt ei bane, fortel Håkon Askeland.

Men det er ikkje berre fotball som blir i fokus – her kjem kommunen sin einaste rulleskiløype, og IL Ternen håpar at folk frå heile kommunen vil nytta seg av den.

– Her er alt gratis! Alle kan bruka det, og det er viktig for oss at det er eit lågterskel tilbod som ikkje kostar skjorta. Enten du er fattig eller rik så skal du ha sjans til å driva med idrett, seier Kenneth.

– Og mosjon heng jo som kjent tett opp mot trivsel, så det er veldig viktig at alle har moglegheita til det, fortel Håkon, og legg til;

– Og så får vi eit løft for skisporten i kommunen.

Erslandsparken har vore på agendaen sidan 2016 og står altså etter planen klar i løpet av hausten 2023.

– Enkelte av oss har fått litt fleire grå hår, men no ser vi enden på det!, ler Kenneth, og legg til;

– Dette betyr jo veldig mykje for oss, fordi vi får skapt ein identitet her på Sandvoll og Utåker, og samstundes gjer vi det meir attraktivt å flytta hit.