– Eg er den eg er, verken meir eller mindre

I desember røysta folket fram Lars Wang som årets namn i Kvinnherad 2023. Bussjåføren, som opphavleg er frå Uskedalen, men no bur i Rosendal, vann ein suveren siger, i ei kåring som knuste alle tidlegare røysterekordar. Som alltid skal vinnaren få ei karikaturteikning laga av Eivind Bøvor. Fredag var tida inne for å overrekka premien.

Avtalt møtestad er naturleg nok Tide-garasjen ovanfor Storebru i Rosendal. På skikkeleg vinterføre kjem Lars Wang køyrande i bussen, direkte frå Årsnes. No skal han ta ein liten pause, mellom anna for å fylla drivstoff, før ferda går attende til Årsnes, og deretter utover i kommunen.

– Dette blir spennande! smiler Lars når han får den innpakka gåva i hendene.

– Oi, sjå der!, utbryt han når mesteparten av papiret er rive av.

Lettare sjokkskadd

Like etter kan han avsløra fyrsteinntrykket. Responsen er overveldande.

– Du må helsa teiknaren masse og seia at dette er det flottaste eg har fått nokon gong, kommenterer Lars.

Teikninga er full av ulike motiv, kvart av dei med mange detaljar. Det tek difor tid å suga alt til seg. Men litt etter litt går det opp for mottakaren kva det eigentleg er han ser på.

– Der er jo saksofonen. Og slipset. Han har til og med fått med …. Gu’ kor stilig. Dette er rått. Nei å nei å nei, seier han overgidd.

Nye blikk vert sendt over biletet, frå topp til botn, frå høgre mot venstre. Endå fleire detaljar stig fram bak glaset og ramma.

– Og der har vi MAN-en, og der er karen som vart kasta i lasterommet. Og der er geitene, seier Lars Wang og humrar av minnet om desse spesielle episodane.

– No vart eg sett ut. Uff, kor stilig, melder han lettare sjokkskadd.

Men framleis er meir i vente.

– Og der er blåbussen. Det er utruleg kva han har fått med seg. Eg er heilt…, rekk han å seia før han bryt ut i ny latter.

– Eg er jo berre ein vanleg bussjåfør

Utaaker

Så kikkar han nærare på hovudmotivet; han sjølv stigande ut av den vidgjetne veteranbussen med skiltnummer R-2055. Då blir Lars meir alvorleg, kanskje litt rørt også.

– Der er 55-en som eg er så glad i. Det var den eg lærekøyrde i, og det var eg som seinare tok initiativet til at vi skulle henta han tilbake og restaurera han, kommenterer sjåføren, og merkar seg at det til og med står «Utaaker» på korrekt, gamal skrivemåte på skiltet som viser endestoppet.

Det store spørsmålet er sjølvsagt kvar kunstverket skal plasserast. På bakgrunn av kor flott teikninga har blitt, er det mogleg behov for eit par drøftingar mellom Lars og kona Nina.

– Ho sa at «den må du ha nede på kontoret». Men eg veit ikkje, kanskje vi heller skal ha den i stova. Dette må eg snakka med ho om, humrar han.

Lars vedgår at han trudde biletet var ferdig etter eit par kveldars arbeid. Når han ser detaljnivået, skjønar han fort at så enkelt er det ikkje.

– Eg er kjempenøgd, det må eg seia!, understrekar han.

Kvardagshelt

Etter at folk fekk lesa kven som vann årets namn-kåringa i den siste utgåva av Grenda i 2023, var det ikkje berre på avisa si Facebook-side gratulasjonane strøymde inn. Lars sjølv har fått mange hyggelege tilbakemeldingar.

– Heilt utruleg, det har teke heilt av, uffa meg. No har folk endå større forventningar til meg, men eg plar seia at «eg er den eg er, verken meir eller mindre, og det kan eg ikkje endra på». Samanliknar du med kva Tormod har gjort for eit heilt land, så er jo det mykje viktigare enn det vesle eg gjer, seier Lars Wang, og tenkjer på sjåførkollega Tormod Myklebust sin enorme innsats for å samla inn og transportera naudhjelp til Ukraina. Myklebust vart nummer to i årets namn i 2022.

– Vi kan kanskje seia at du er ein typisk kvardagshelt?

– Ja, men det skal liksom så lite til. Eg likar å snakka litt med passasjerane, og då er det ofte nokon som fyrst er litt stille, før dei opnar seg opp. Det er viktig å ta vare på alle. Dei fleste greier seg sjølve, men mange eldre vil gjerne prata, og så er det ein del unge som har sine ting, analyserer Lars Wang.

God PR for Tide

Framleis, halvannan månad etter offentleggjeringa, vert han stadig gratulert.

– Det strøymer på, og det går ikkje éin dag utan at nokon gratulerer meg. «Eg stemde på deg, eg stemde på deg», seier dei til meg.

Respons har han også fått frå leiinga og andre tilsette i Tide. For då sigeren var eit faktum, vart det gjort kjent på internsida til konsernet.

– Det er jo god PR for heile selskapet, ikkje berre for meg, vurderer Lars.

Grenda gjer mannen merksam på endå eit par detaljar i teikninga, til dømes motivet frå den gong Lars Wang køyrde inn i baken på mjølkebilen utanfor KVV. Og ikkje minst skiltet som viser ei fartsgrense på 45, sjølvsagt som eit hint om kor lenge han har jobba i HSD/Tide.

– Her er jo heile livet mitt. Og ansiktet mitt, det er jo slik eg ser ut. Til og med stjerten i håret har han fått med. Alt er med. Dette er over all forventning, det er ikkje til å lura på, seier Lars og flirer endå ein gong.

Prikken over i-en

I mars fyller Lars Wang 67 år. Han prøver å trappa ned i jobben, men har ingen planar om å slutta heilt. Og alle som reiser offentleg i Kvinnherad, kan gle seg over at det er lov å køyra buss til ein fyller 75.

– Dette er den finaste gåva eg har fått i heile mitt liv. Eg har fått mykje forskjellig, men dette er prikken over i-en. Etter å ha jobba i så mange år, og så få ei slik merksemd; dette betyr mykje for meg, avsluttar Lars Wang.

Nokre ord frå teiknaren

Årets teikning frå Eivind Bøvor får mykje ros for alle dei fantastiske detaljane. Korrespondansen undervegs i prosessen stadfestar at dette er noko kunstnaren legg stor vekt på.

Eivind Bøvor har røter i Omvikdalen, men bur på Jørpeland. Han har laga alle dei hittil 14 årets namn-teikningane. Grenda har sjølvsagt hatt tett dialog med kunstnaren undervegs også denne gong. Mykje har handla om detaljar. Allereie 3. januar kom følgjande e-post tikkande inn frå byen i Ryfylke.

«Takk for bilete og artikkel. Ser ut som ein verdig vinnar igjen, og trur det blir morosamt å teikna. Kunne du finna eit tydeleg bilete av den bussen han køyrer mest no og/eller skulebussen? Elles la eg merke til historia om amcar-mannen som blei lagt i bagasjerommet. Litt avhengig av når det skjedde, men bagasjerom var vel på sida av bussen då? Har du bilete av mjølkebilen han køyrde på? Elles kunne det vore fint med eldre bilete av han og bussar han har køyrt, men trur ikkje det er essensielt».

Augefargen

Den 12. januar sendte Eivind Bøvor over ei endeleg skisse.

«Sidan Lars Wang er interessert i fotografi, så fekk eg ideen om å la køyretøy og «snapshots» frå yrkeslivet hans liggja som bilete i biletet. Dei to eldste bussene er vist i bilete med kvit ramme rundt, slik formatet var på den tida, trur eg. Litt nostalgi er det jo her, så prøver å få det tidsriktig. Landskapet rundt er vel eit generelt vestlandsk dal-landskap, ikkje så ulikt Uskedalen. Eit spørsmål: Kan du seia meg om Volvo-bussen har raude felgar? Ser at eg har gløymt rutebil-skiltet på bussen. Det skal med», skreiv han.

Når vi kjem til 22. januar er meisterverket nesten ferdig. Men eit par siste spørsmål tikkar inn.

«På bileta ser augefargen til Lars ut til å vera grå-grøn, stemmer det? HSD-merket på sida av Volvo-bussen, var det også på sida av Scania-bussen?».