– Alle skal vera velkomne

– Det er heilt fantastisk at vi klarar å mobilisera så mange på ein gong. Det plar vera veldig mange som kjem, men i kveld er det jo stinn brakke, seier styreleiar i IL Ternen, Gro Rusten Saghaug.

Ho fortel at dette er fyrste gong dei arrangerer basar etter pandemien, og at det nok er fleire som har sakna det, og det syns på oppmøtet. IL Ternen har pleidd å arrangera basar årleg, og det er så godt som hovudinntekta deira.

– Pengane vi får inn i dag går jo rett til vedlikehald i Tveitedalen, og til at vi skal kunna oppretthalda aktiviteten der inne, fortel Gro.

IL Ternen

Utanom eit framifrå skianlegg, har IL Ternen fleire andre «klubbar». Dei har damenes aftan, som er trim for damene, seniorbandy og dei skal starta opp att med skileik innan dei neste vekene.

– Det avheng litt av snø og slikt så klart, men der har vi Mr. Tveitedalen til å passa på, seier Gro.

Mr. Tveitedalen, eller Håkon Askeland, som han eigentleg heiter, bur rett ved Tveitedalen og er ofte ute for å sjekka forholda.

– Eg er nok litt over gjennomsnittet oppteken av snø, fortel han lattermildt.

Håkon og Gro er begge opptekne av at tilboda skal bestå på Sandvoll og Utåker, og at det skal vera ein kjekk og attraktiv plass for alle.

– Vi er jo begge fødd og oppvaksne her og har vore med i Ternen IL då vi var unge, så vi har eit veldig tett og kjært forhold til det, smilar Gro.

ILdsjel og potet

Basaren gjekk som det susar, og det var tre rundar med åresal før hovudpremiane skulle loddast ut. I tillegg hadde dei selt ut 12 loddbøker på førehand, og det tilseier om lag 60 000 kr.

– Så når vi tel opp for åresalet har vi nok fått inn over 100 000 kr, seier Julie Holmedal Askeland, som er ansvarleg for mellom anna marknadsføring og medlemskap i IL Ternen, eller som ho seier sjølv; ein «eldsjel og potet».

-Samstundes er det jo høge prisar på alt for tida, drivstoff og straum, vi har jo skiheis og lysløypa vi skal drifta gjennom vinteren, så det er usikkert kor mykje vi får dekka i løpet av vinteren med desse pengane.

Ternen har nett skaffa seg ni nye sponsorar som gjer det økonomiske litt meir føreseieleg. Men dei ynskjer at alle som vil meldar seg inn som medlem.

– Jo fleire som er medlem, jo meir støtte kan vi få, så det er berre å registrera seg, seier Julie.

I Ternen er dei opptekne av å ha eit mangfaldig tilbod, og at det skal vere lågterskel, slik at kven som helst kan vere med.

– Viss vi har veldig høge prisar blir det jo til at vi ekskluderer nokon, og det vil vi ikkje. Det er viktig for oss at alle skal vere velkomne. Vi vil ha eit tilbod som når ut til dei fleste, vi ynskjer eit levande lokalmiljø her på Sandvoll og Utåker, smiler ho.

Kva er det som driv dykk?

Det er rett og slett at alle skal få ha ein plass å gå. Og så får vi så mange positive tilbakemeldingar både frå folk i kommunen og folk som kjem frå andre plassar – og det er jo i grunn den takksemda som gjer at ein orkar fortsetja, smilar ho.