«Alle» deltok i ryddeaksjon

I Monsafjøro var 2.klasse ved Rosendal skule på plass. Dei reinska godt opp og leita under kvar ein stein for å finna ting som ikkje høyrde heime.

– Problemet er det som heng fast under store steina. Tau er det mykje av her, men det har surra seg godt innimellom, seier Linda Hjelmeland.

Ho er koordinator for prosjektet i Kvinnherad, og oppteken av å skapa engasjement rundt søppel i hav og langs strender. Ho fortel at det tidlegare på dagen vart funne 70 kg boss berre rundt elvastien, og at dagen før fann Miljøvernforbundet eitt tonn med boss på Varaldsøy.

– Ein skulle tru det var veldig reine strender her nede, sidan dei blir brukt så mykje. Men om vi grev litt så finn vi ganske mykje, seier ho.

Tonnevis med plast er rydda: Sjå video frå sorteringsarbeidet i Rosendal

Berre blide fjes å sjå!

Eg fann, eg fann

– Eg fann ei trusa, kniser andreklassingen Unni.

Ho peiker innimellom steinane som ligg i strandkanten og Linda kikkar inn. Frå langt inni røysa trekk ho fram ein shorts.

– Her må det vere nokon som har bada og gløymt å ta på seg shortsen igjen etterpå, ler ho.

Unni og Linda har allereie fylt opp posane sine med tau, plastbitar, isopor og anna småting. Dei fann òg ein fullt brukande spade, som dei gav til barnehagen når dei kom forbi. Resten av klassen har fylt opp ein heil bossekk og dei har også plukka med seg eit bildekk, ei sprayflaska og ved eit feiltak ei grensestolpe.

– Eg fann desse kule solbrillene, seier Tarjei stolt medan han viser frem eit par stilige Ray-Bans.

No manglar dei berre ein topp og nokre badesko så har dei eit heilt antrekk.

Etter ryddinga var det bort for å kaste bosset. Det var dei i full gong med å dra boss ut av konteinarane for å sortera i det. Dette tykte ungane var veldig gøy å sjå på, og medan dei sto der kom ei av organisatorane bort med Ragn Sells-kapsar til heile gjengen, noko som var veldig stas.

– Burde ikkje vere lov å kasta boss i naturen

Over 2000 frivillige i sving: No er sorteringa i gang

FUS Barnehage

Også FUS barnehage med sin Midtseteravdeling var i Monsafjøro torsdag. Dei fann både snusboksar, plastbitar, eit gammalt røyr og mange, mange skjell.

– Eg har funne ei tacolefsa!, ropar Helene plutseleg, og alle strøymer til for å sjå.

– Nei, det er eit skattekart! seier Alma spent.

Det viste seg å berre vere eit heilt vanleg boss av typen papir-underlag, men om det har vore eit skattekart teikna på det, om nokon har funne skatten og kor den eventuelt oppheld seg no, kjem vi nok aldri til å få veta.

Kjekt å rydda

Barne- og ungdomsarbeidar Janne Helen Skåre fortel at barna er veldig flinke å rydda. FUS barnehage har fleire metodar for å fremje berekraftig utvikling, og nokre av dei er å rydde opp etter seg sjølv og andre på tur, og å halde det reint i nærmiljøet. Så ein plastryddetur er midt i blinken for barnehagen.

– Dette er jo eit godt brukt område, både av oss og andre, så det er lite å finna her, seier ho.

Dei hadde likevel samla fleire halvfulle poser då Grenda gjekk.

– Det er fint å rydda opp litt, seier Alma til meg mens ho plukkar opp ein liten plastbete.

– Det er jo veldig viktig å fjerna alt bosset sånn at ikkje dyra kan eta det og bli sjuke, skyt Jonas inn

Alle barna er einige om at dei ryddar mest for at ikkje dyra skal ete noko dei ikkje toler, som ville vere veldig trist.

– Dei har absolutt gledd seg til dette. Dei har forstått at dette er viktig, og at vi skulle plukke boss for at ikkje fiskane skal døy, fortel barne- og ungdomsarbeidar Gunn Kristin Raudstein.

Engasjement i heile kommunen

Journalistspire

Det var ikkje berre rydding som var i tankane til ungane i barnehagen. Det var litt leik og litt rydding og ein del undring over kven denne rare dama med kamera og notatblokk var. Gaute tok ein pause i ryddinga for å intervjua bladfyken. Han lurte på kva i alle dagar ho gjorde i Monsafjøro, kor hen ho budde, kor langt unna det var og om ikkje ho skulle snakka med skuleelevane i staden.

Rett og slett ein gryande journalist.

Yrande engasjement for ryddeaksjonen

Morten Abel heidrar strandryddarane!