Rekordmange bilete til kalenderen

Morten Nygård

Morten Nygård

morten@grenda.no

Publisert: 21. november 2020, 08:00

Lesarane har alltid vore flinke til å senda bilete til Grenda-kalenderen. Men i år tok det heilt av.

Kalenderen for 2014 var den fyrste Grenda gav ut, etter at vi overtok stafettpinnen frå Kvinnherad Sparebank (seinare SR-Bank) og sist Kvinnherad Turlag. Den gong skjedd alt i hurten og sturten, så avisa rakk ikkje anna enn å bruka eigne tilsette sine beste bilete. Men allereie året etter inviterte vi ålmenta med på leiken, og kvart år seinare har vi fått tilsendt mange gode kandidatar.

Førre veke vart 2021-kalenderen sendt til trykkeriet. Og denne gongen hadde vi kolossalt med gode bilete å velja blant.

– Det må vera rekord for innsendte bilete, slår grafikar og fotograf Gunn-Bente Stølen fast.

Ho hadde oppgåva med å plukka ut dei 12 motiva som det var plass til.

– Folk er flinke til å ta bilete, det er det ikkje tvil om. Utveljinga var vanskeleg, for dei forskjellige områda av kommunen må vera representert. Diverre var det nokre gode bilete som mangla namn, så det må innsendarane passa på til neste år, fortel Gunn-Bente.

 

Ikkje solnedgangar

Dei fleste av bileta som ikkje kjem på prent i kalenderen, vil etter kvart dukka opp i papiravisa vår som vanlege lesarbilete. Gunn-Bente kan elles gje eit par gode tips for å auka sjansen for at akkurat ditt bilete blir valt ut neste år.

– Ytterkantane i kommunen kan godt bli flinkare til å senda inn. Då tenkjer eg på Fjelberg, Halsnøy, Åkra, Ølve og Hatlestrand. Vi skulle gjerne hatt fleire bilete å velja blant derifrå, men dette problemet har vi eigentleg hatt kvart år. Og så kan folk gjerne ta bilete av noko anna enn solnedgangar og av hunden sin, smiler ho.

Eit par solnedgangsbilete og ein hund er funne verdig plass på kalenderen, men dette er altså to kategoriar det er beinhard konkurranse innanfor.

Vi kjem attende med beskjed når kalenderen er klar for henting/distribusjon.