Reiser til Hålandsdalen for å trena skiskyting
I den yngste skiskyttargruppa til Hålandsdal IL er kvinnheringane i fleirtal.
Kvar onsdag stiller kvinnheringane sterkt på skiskyttartrening i Hålandsdalen. I treningsgruppa som er for utøvarane i alderen ni til tolv år, er sju av tolv frå Kvinnherad.
Artikkelen held fram under annonsen.
– Vi er i klart fleirtal. Så eg trur absolutt at det hadde vore mogleg å fått til ei skiskyttargruppe i Kvinnherad også, seier Kjetil Mehl frå skigruppa i Omvikdalen IL.
Fasilitetar
Han reiser sjølv med sine unge håpefulle, Maiken og Sondre, til Hålandsdalen éin gong i veka.
– Eg har drive med skiskyting før, og vil strekkja meg litt lengre for at også mine barn skal få lov til å driva med det. For å få det til så bruker vi fire timar på å reisa til Hålandsdalen kvar onsdag, seier Kjetil.
Med på reisa er det fleire kvinnheringar. I tillegg til familien Mehl, reiser også søskena Amalie, Peder og Cecilie Sundal Utne til Hålandsdalen kvar onsdag. På Gjermundshamn-sida kastar også Thomas Hjortland og Gitle Femsteinevik seg med.
– Vi er mange kvinnheringar til saman i denne treningsgruppa. I tillegg så det jo fleire frå familien Femsteinevik i dei eldre gruppene, seier Kjetil Mehl, som er sikker på at det hadde vore mogleg å få på plass eit skiskyttarmiljø i Kvinnherad om fasilitetane var der.
– Det trur eg. Det er ikkje så lett å få til eit tilbod når ein ikkje har anlegg. Men vi får håpa på ei god utvikling i Fjellhaugen, og at det kan bli mogleg å få til noko der. Vi håper i alle fall det, seier Kjetil.
Artikkelen held fram under annonsen.
Klubbrenn
I helga var seks av dei sju kvinnheringane med på eit klubbrenn i regi av Hålandsdal IL, og fekk med det kjenna litt på korleis det er å konkurrera både i langrennssporet og på skytebanen. Om nokre år håper dei å kunna gjera det også i Kvinnherad.