Ragnhild skal gå verdscup i Nove Mesto

Marius Tveit Nissestad

Marius Tveit Nissestad

marius@grenda.no

Publisert: 23. februar 2021, 08:46

Ragnhild Femsteinevik får betalt for strålande prestasjonar.

Etter å ha kjempa i toppen i fem IBU-renn i Slovakia, der ho krona to gode veker med ein pallplass på søndagens jaktstart, kom telefonen frå skiskyttarforbundet måndag kveld. Ragnhild er ei av seks jenter som er teke ut til å gå verdscupen for Norge i tsjekkiske Nove Mesto 2. til 14. mars.

– Eg hadde eit håp om å få sjansen etter gode resultat den siste tida, men det er mange som presterer bra i IBU-cupen om dagen. Så det er utruleg stas å bli tatt ut. Eg gler meg til å sjå kor langt eg har opp til dei aller beste i verda, seier Ragnhild.

Verdscup-uttaket kunne nesten ikkje ha kome på eit betre tidspunkt for 25-åringen frå Hatlestrand.

– Eg er glad for at eg slepp IBU-cuprennet i høgda, då eg har veldig dårleg erfaring med det frå før. Og så er det veldig kjekt å få prøva seg i verdscupen når ein veit at formen er bra, seier ho.

Ho er teke ut saman med Tiril Eckhoff, Marte Olsbu Røiseland, Ingrid Landmark Tandrevold, Ida Lien og Karoline Knotten.