Produserer 600.000 middagar dagleg

Kjetil Haktorson frå Valen har teke over som slakterisjef ved Viking Fjord AS etter at Carl Erik Arnesen gjekk av i desember.

– Eg vart spurd om å ta over når Carl Erik bestemte seg for å tre av. Då tok eg ein liten runde med leiargruppa her på bruket for å høyra kva tankar dei hadde om det, og når dei alle var gira og klare for å gje jernet vidare, vart valet mitt enkelt, seier Haktorson.

 

Frå golv til topp

Lukta av nysløya laks møter ein som enn vanleg i entreen til slakteriet på Sunde. Opp ei trapp og forbi resepsjonen sit den nye slakterisjefen, like smilande som alltid. Han gjekk i desember over i den nye stillinga, etter å ha vore produksjonssjef i mange år.

– Jobbkvardagen vert faktisk mykje lik det han vore dei siste to åra. Den største skilnaden er nok at eg no har eit større ansvar, og med det står som ansvarleg på papiret, smiler Haktorson.

Eit ansvar han lev godt med. For etter å ha byrja på golvet 6. juni 1994, har den høgreiste mannen figurert som leiar for kvar og ein av stasjonane som utgjer det imponerande rullebandet på bruket. Og han kan den dag i dag tre rett inn i arbeidet på merdane, i bløgginga, slaktinga eller pakkinga om det skulle vera behov for det.

– Og det synst eg er viktig. Eg er eigentleg ikkje noko tilhengjar av ein rein kontorjobb. Eg er ofte rundt nede i produksjonen for å sjå og forhøyra meg om kva som skjer. For det er viktig for meg å vita kva som skjer rundt om på dei ulike stasjonane, seier han.

Når ut til 30 land

I jobben som slakterisjef har han ansvar for 65 tilsette og at den formidable produksjonen på daglege 120 tonn ferdigslakta laks går som den skal.

– Det er 600.000 middagar til dagen, det. Og då er det snakk om ein god porsjon. Det er heilt ekstreme mengder. Faktisk så produserer vi éin fisk i sekundet, og det er det ikkje alle som veit. Til og med mine eigne foreldre er enno ikkje heilt klare over dei store mengdene det er snakk om, og vert imponert kvar gong det er oppe i samtalen, ler han.

Kundar av Viking Fjord eksporterer i dag laks til nærare 30 ulike land rundt om i verda. 70 prosent av produksjonen endar opp i Europa, medan resterande 30 går til land i Austen. For å få det til går det kvar dag seks fullasta trailerar med nypakka og ferdigslakta laks ut frå kjølelageret på Sunde.

– Vi sløye, skrape, pakke og sende laksen heil ut her i frå. Så går den til omarbeiding rundt om til dei forskjellege landa. Og dess fleire land vi har på kundelista, jo fleire moglegheiter får vi. For det er ikkje slik at alle land vil ha det same. Nokon vil ha stor fisk, andre vil ha små. Austen til dømes, dei vil ha så stor fisk som mogleg, gjerne over sju kilo, seier slakterisjefen og hiv nedpå siste slurk med kaffi og viser veg ned i nedste etasje. Kor magien skjer.

Litauisk arbeidskraft

Ikledd iaugefallande raud slaktedress, klogger og plastikklue viser sjefen oss eit samleband av imponerande krefter. Alt frå fiskens veg opp frå merdane, til slakteri og kvalitetssjekk, før han ligg ferdigslakta på is i flysikre isoporesker.

I tillegg til den nødvendige og presise maskinkrafta er det også rikeleg med manuelle krefter i sving langs samlebandet. Brorparten av dei innleigde frå Litauen.

–  I 2007 bestemte vi oss for å auka produksjonen betrakteleg. Eg gjekk då ut i fem forskjellege aviser i områda rundt og søkte arbeidskraft. Vi trengte ein stad mellom femten og tjue mann, men enda opp med fattige to søknadar. Då vart leiinga einige om at vi skulle byrja å leiga inn arbeidskraft, seier Haktorson.

Og gjennom eit samarbeid med eit norsk firma og med norske retningslinjer og norsk løn, fekk Viking Fjord på plass ein avtale som sikra dei litauisk arbeidskraft.

– Og i dag har vi 30 innleigde frå Litauen i arbeid. Fleire av dei har vore med sidan 2007, og fleire har fått fast jobb, seier Kjetil.

Og før Haktorson set seg tilbake i dagleg leiar-stolen, og vi takkar for oss. Må vi spørja ein lakseslakterisjefen det obligatoriske spørsmålet om han et laks.

–  Eg er veldig glad i laks, det er eg. Men det vert sjølvsagt mest til at eg et det når eg er på middagsbesøk hos andre, ler han.