– Privat kabel vil råka industrien

Jette Christensen (Ap) og Are Tomasgard (LO) fryktar høgare straumprisar og nettleige vil råka Hydro Husnes hardt, om høgresida vinn valet.

Marius Tveit Nissestad

Marius Tveit Nissestad

marius@grenda.no

8 september, 2017

Grunnen til at dei fryktar det er Northconnect sin OED-søknad om handelskonsesjon for å byggja ein privat krafteksportkabel frå Hardanger til Skottland.

– Det kan få store konsekvensar for industrien i Hardanger og Sunnhordland. Og det er valet som avgjer kva skjebne vi får, sa Are Tomasgard frå LO og la til.

– Høgre og FRP har opna opp for både fleire kablar og private kablar. Det er openbart at kablane vil kunna føra til auka nettleige og at dei vil føra til auka straumprisar for norske kundar.

Jette F. Christensen er stortingskandidat hor Hordaland Ap, og brenn for å forvalta felleskapet sine interessar best mogleg, og på den måten auka sysselsettinga.

– Vi treng fleire arbeidsplassar og eit nytt industrieventyr. Arbeidarpartiet vil at kraftoverskotet skal koma fellesskapet til gode. Det skal bidra til fleire arbeidsplassar og verdiskapning i Norge. Då er det ikkje samfunnsmessig lønsamt å byggja utlandskablar som kan bidra til høgare straumprisar her til lands. Vi må bruka dei to største ressursane vi har, dyktige arbeidarar og kraft, til å skapa eit nytt industrieventyr, seier Christensen.

Etter ein prat med pressa, fekk Christensen og Tomasgard ein omvising på verftet av Tor Thorsen. Noko stortingspolitikaren gleidde seg til.

– Det er alltid kjekt å koma på besøk til Hydro Husnes og få høyra på kva dei har å seia. Dette er eit godt eksempel på det som er framtidas industri, og er alltid imponert etter eg har vore her, slutta ho.