Populær laurdagskafé

Mykje folk fann vegen innom lokala til Rosendal Motell på laurdag.

Arrangementet var eit samarbeid mellom motellet og Røde Kors sitt prosjekt – Møteplass for inkludering. Praten gjekk fritt på mange språk, latteren og smila sat laust, og hyggefaktoren var tydelegvis stor. I alt må det ha vore i overkant av 100 stykke som hadde benka seg mellom borda denne fyrste ettermiddagen i april.

I tillegg til ein god prat, var det også oppvisning med dans og musikk. Det vart også freista med mat tufta på oppskrifter frå Spania, Filippinene, Tsjekkia, Eritrea og Noreg, samt gode kaker for dei desserthungrige – alt laga til på dugnad.

 

Mange nasjonar

To av initiativtakerane, Arne Martin Guddal Husby og Anita Falk, var særs begeistra over det gode oppmøtet.

– Det er veldig kjekt å sjå at folk kosar seg. Her er det folk frå mange nasjonar og på tvers av generasjonar og kulturar, fortalde dei to.

– Arrangementet er sponsa av Røde Kors, og det vil det også vera neste gong. Det plar vera kafé på dette viset annan kvar månad, slutta Anita før oppryddingsarbeidet må ta til.