Populær båtbyggjedag i Ølve

Marius Tveit Nissestad

Marius Tveit Nissestad

marius@grenda.no

21 august, 2018

Meir enn 150 personar la søndagsturen til skipsbyggjeplassen Øyra på Nerhus for å få med seg årets båtbyggjedag.

– Det var utruleg kjekt at så mange ville ta turen, faktisk så mange at me ikkje klarte å telja. Det var i alle fall 150 innom, som igjen er mykje meir enn i fjor, seier Eva Røyrane frå kulturnemnda i Ølve bygdelag.

Det er andre året på rad at Ølve bygdelag inviterer til båtbyggjedag på skipsbyggjeplassen Øyra på Nerhus. På årets utgåve kunne bygdelaget tilby dei besøkjande utstillingar på dei to gamle verfta som fortalde skipsbyggingshistoria i bygda, eit føredrag om skottehandelen av Vidar Ask og sjølvsagt eit båtbyggjeri for dei yngste.

– Det såg ut til at dei besøkjande koste seg valdsamt, og at dei var begeistra for at det er eit arrangement som passar til fleire generasjonar. Ein stad der både besteforeldre, foreldre og born kan vera saman og ha det kjekt, seier Røyrane.

I år som i fjor vart arrangementet velsigna med opphaldsvêr. Sjølv om det ikkje såg lovande ut, så skein det opp då arrangementet starta.

– Me var heldige også i år. Så vi fekk besøk av mange som kom sjøvegen. Tysnes Kystlag tok turen med nokon av båtane sine, det gjorde også folk frå Husnes og Halsnøy. I tillegg kom Kvinnherad kystlag med ein stor gavlabåt. Alt i alt så vart det ein veldig vellukka dag, seier Eva.

– Så det freistar til gjentaking?

– Absolutt. Det er berre til å fortsetja når det tydelegvis er eit arrangement som folk ynskjer, sluttar ho.

(Foto: Kristen Tore Christensen)