Politiet åtvarar mot farlege tablettar

Politiet er svært bekymra for ein type tablettar som er i omlaup i ungdomsmiljøet i Bergen.

– Vi åtvarar sterkt mot bruk av desse tablettane, som lett kan føra til overdose, særskild i kombinasjon med andre rusmiddel. Inntak av slike tablettar kan for ungdom med låg toleransegrad i seg sjølv vera livstrugande, skriv politiets nettpatrulje på Facebook.

Eit innlegg som igjen er delt av Kvinnherad lensmannsdistrikt på Facebook.

Tabletten dei går ut og åtvarar mot heiter Ksalol, og har ein angstdempande og roande effekt.

– På grunn av overdosar blant unge dei siste dagane, ser politiet eit sterkt behov for å gå ut med denne informasjonen. Vi har ingen å mista, skriv nettpatruljen avslutningsvis.