– Paraplyen kan liggja heime på nasjonaldagen

Sett vekk frå ein austleg bris og eit høgt skydekke, lovar meteorologane opphald og temperaturar opp mot 21 grader på nasjonaldagen.

– Det ser lovande ut for Kvinnherad, det gjer det. Det er venta at det kjem ein austleg bris, der det kan bli frisk bris utsette stadar. Utanom det er det stort sett fint vêr og opphald med temperaturar opp mot 20 og 21 grader, seier vakthavande meteorolog Haldis Berge ved Yr.no.

Og sjølv om eit høgt skydekke kan øydeleggja litt for den asurblå, skyfrie himmelen, vert det ikkje fare for nedbør.

– Eg trur ikkje det høge skydekket blir tjukt nok til å stenga sola ute. Og det er ikkje fare for nedbør, så paraplyen kan trygt liggja heime, sluttar Berge.