– Pandemien blei starten på slutten

Eigarane bak Sagvåg-puben Anno1564 har bestemt seg for å leggja ned etter to års drift.

– Vi er lei oss for å fortelja at vi dessverre må gi oss, sjølv om ønsket om å fortsetta er stort. Vi har hatt så mange fantastiske stunder med dykk i to år, og vi sit no her og mimrar tilbake til mange minne, skriv Anno1564 på Facebook.

Puben vart starta opp av Showbasen AS, som igjen vert drifta av kvinnheringane Trond Betten, Niclas Olderkjær og Arve Rødland for to år sidan. Dei har fått erfara at det å driva pub i distriktet ikkje berre er enkelt.

– Dessverre blei det slik at pandemien vart starten på slutten. Det er ikkje noko leik å driva pub i distriktet, men vi trudde ikkje ein marknad i Kina skulle ha noko å seia for oss i koselege Sagvåg. Men verda er liten iblant. Pandemien sine reglar snudde ting litt på hovudet, arbeidsbyrda kombinert med mangel på inntekt på grunn av restriksjonar gjorde reknestykket umogleg, skriv dei på Facebook før dei takkar innbyggjarane på Sagvåg.

– Det er mange fantastiske hjelparar vi aldri kan få sagt nok takk til, men de veit kven de er. De er berre heilt fantastiske. Sagvåg og omegn, for ein gjeng, står det å lesa.