(Foto: privat)

På tur med Røde kors omsorg

Måndag 20. mai 2019 laga Røde kors omsorg til dagstur for pensjonistar og bebuarar frå Husnestunet.

Dette var ei avslutning på den populære samlinga «Syng med oss», som går føre seg annankvar onsdag, og som pensjonistar og bebuarar frå Husnestunet set stor pris på. Her kan samlast godt over 100 personar, både pensjonistar og pårørande. Eit herleg skode!

Artikkelen held fram under annonsen.

Så no skulle eindagsturen gå av stabelen. Bussen starta frå Rosendal klokka 08, og tok opp folk utetter. Då bussen kom til Husnestunet og alle var komne på plass, var me 47 personar pluss sjåfør Thor Arne Eik Nygård, ein framifrå grei og stødig kar. Ansgar Bjelland  var guide. Det er utruleg kor mykje du får ut av turen når du får høyra om bygdene me fer framom. Gunn Nanny Røssland var reiseleiar, med gode medhjelparar, og såg om oss på beste måte.

 

Middag

Me tok ferje til Skånevik over Håland, og køyrde den nye tunnelen til Kyrping. Så gjennom ny tunnel og stopp på Åkrafjordtunet. Der fekk med vaflar og kaffi, som smaka framifrå godt. Litt handel fekk me tid til også. Turen gjekk vidare gjennom Åkrafjorden; Fjæra, Rullestadjuvet, over Vintertun, med ein liten stans i Odda. Turen gjekk vidare innover dei flotte bygdene med frukttre i full blom. Sørfjorden låg spegelblank med små krusingar der sola glitra som gull; eit herleg syn. Turen gjekk no til Kinsarvik First Hotel, der me skulle eta middag. Då alle var komne på plass fekk me herleg middag med tilbehøyr, dessert og kaffi, som smaka framifrå. Og den gode drøsen tok til.

Turen gjekk vidare inn Hardanger, med blømande frukttre og framleis strålande sol. No skulle me over Hardangerbrua. Den vart opna for trafikk 17. august 2013.Det er Norges lengste hengebru med eit spenn på 1.310 meter, og med dette ei av dei største i verda. Prislappen var 2,5 milliardar kroner.

 

Twist

Snart var brua tilbakelagt, og turen gjekk gjennom Granvin, med ferja frå Kvanndal til Utne. Vêret var like fint, med sol frå skyfri himmel. Ein strålande dag! Ein liten stans for vegarbeid. Då kom «omsorg» rundt med Twist som me kosa oss med. Vatn hadde me fått tidlegare. Ein stor honnør og takk til dåke!

Artikkelen held fram under annonsen.

Snart var me gjennom Folgefonntunnelen og fekk sjå eit herleg syn av vårt kjære Kvinnherad.

Til slutt vil eg takka alle for ein triveleg tur, med koselege reisefeller. Ansgar Bjelland for strålande forteljarkunnskapar, og sjåfør Thor Arne Eik Nygård som losa oss vel heim. Til sist vil me takka reiseleiar Gunn Nanny Røssland med gjengen hennar for ein fantastisk flott tur.

God sommar til alle!

 

Av Karoline Røssland

 

(Foto: privat)