Overnatta på Melderskin i russedressen

Marius Tveit Nissestad

Marius Tveit Nissestad

marius@grenda.no

16 mai, 2018

Magnus Eide frå Halsnøy fekk ein luftig start på skuledagen tysdag.

Og sjølv om raudrussen tok frukosten på Melderskin, rakk han skuledagen på Stord vidaregåande.

Passande nok har Magnus dette på russebuksa. (Foto: Privat)

– Eg vakna av solskinet i fem-tida på morgonen, og tok frukosten i nydelege omgjevnadar før eg rusla ned i seks-tida og var på plass på skulen halv ni. Så det var ein skikkeleg frisk og fin start på dagen, seier raudrussen.

– Kvifor bestemte du deg for å gjera dette då?

– Nei, eg sat inne på jobb og såg ut på det nydelege vêret eg gjekk glipp av. Og når det blir mykje skule og jobb, så må ein bruka kveldane og nettene for å få utnytta det mest mogleg. Så etter eg var ferdig på jobb pakka eg soveposen og la på tur opp mot Melderskin, seier han og legg til:
– Og for ein tur det var. Eg begynte å gå i åtte-tida, og fekk med meg heile solnedgangen på veg opp. Vel framme på toppen la eg meg i soveposen og nøyt nista mi til ein fantastisk utsikt, seier han.

I tillegg til nydeleg utsikt, nytta han sjansen til å ta eit idyllisk russebilete.

– Det var jo også litt av grunnen det også. Eg ville finna på noko litt annleis og ta eit kult russebilete, samstundes så er jo det ei fantastisk oppleving. Så dette er noko eg absolutt vil anbefala framtidig russ å gjera, kanskje det kan bli ein trend, ler Magnus.

(Foto: Privat)
(Foto: Privat)