Over 5 millionar har sett Anita sin video

Anita Enæs (50) skulle berre senda ein artig videosnutt til venene sine. No er videoen sett av 5,2 millionar menneske på TikTok.

– Det er heilt sprøtt. Eg sat jo berre og kjeda meg, og skulle eigentleg berre sjå om eg fekk det til, så skulle eg laga ein liten snutt til dei få venene eg har på Snapchat. Men så la eg visst ut videoen på TikTok før eg sende han vidare. Då tenkte eg at det måtte gå fint, for det var ikkje mange som kom til å sjå den videoen på min TikTok uansett. Men så feil kunne eg ta, seier Anita Enæs.

 

Telefonen gjekk varm

For snart tre veker sidan la kvinna frå Uskedalen ut ein video, der ho held ein vaskebørste som ho plutseleg frys i biletet før ho igjen snur seg og går rett i skaftet, på det populære sosiale mediet Tiktok. I lunsjen nokon dagar seinare gjekk telefonen plutseleg varm. Då hagla det nemleg inn med likarklikk.

– Plutseleg gjekk videoen heilt amok i Sverige. Sidan då har det berre spreidd seg. Det vart faktisk så mykje at eg måtte slå av varsla for likarklikk, seier ho.

I skrivande stund er det 5,2 millionar menneske som har sett videoen og nesten 1 million som har likt han.

– Det er jo veldige morosamt dette her. Men sjølv om det er gøy, så er det jo litt flaut òg. Eg er jo femti år gamal, så dei ser jo på gamla som dansar, ler Anita.

Men sjølv om videoen hennar no har nådd alle verdas kantar, har ikkje Anita noko oppskrift på korleis ein skal slå gjennom i sosiale medium.

– Det enklaste er ofte det beste. Men dette var nok den eine gongen det kom til å skje, sluttar ho.

 

 

@anita50andalive♬ SexyBack - Justin Timberlake