Opptrer på Husnes

I morgon kveld framfører Are Kalvø showet sitt «Hyttebok frå helvete» i Kulturhuset Husnes.

Det vert sagt at showet er ein komikars motvillige forsøk på å læra seg å elska naturen.

«Are Kalvø er ein nordmann som ikkje verkar. Han vaks opp midt i eit postkort på Vestlandet, omgitt av fjordar og fjell som folk reiser halve kloden rundt for å oppleva, med turmoglegheiter på alle kantar. Likevel har han aldri blitt ein naturens mann. Han flytta til byen og såg seg aldri tilbake. Dette har aldri vore eit problem. Før no», står det ein omtale av framsyninga.

For nokre år sidan byrja nemleg Kalvø «å mista» venner til naturen. Ein dag måtte han innsjå at han ikkje hadde ein einaste Facebook-venn som ikkje hadde lagt ut eitt einaste bilete av seg sjølv på eit fjell. For fyrste gong sidan han blei tvinga til slikt på skulen, la Kalvø derfor ut på tur, på ski og til fots, for å finne igjen vennene sine. Og for å finna ut kva i alle dagar det er som skjer.

«Denne kvelden fortel han om turen, om vår tid, om naturen og om overraskande mykje anna som du ikkje trudde hadde noko med saka å gjera. Det blir stand-up. Det blir vitsar. Det blir tull. Det blir eit par uventa harde utfall mot alle som liker fjell betre enn folk», vert det varsla.