Opplagsauken held fram

Det vart kakefest på Grenda-kontoret i går. Dei nye opplagstala var det nemleg all grunn til å feira.

Onsdag vart nye opplagstal for avisene tilslutta Mediebedriftenes Landsforening og Landslaget for lokalaviser (LLA) offentleggjort. Tala gjeld for perioden 1. januar til 30. juni 2020, samanlikna med 2. halvår 2019. LLA-avisene har no eit samla opplag på 361.000, noko som er ein nedgang på rundt 1.000 abonnentar sidan førre måling. Også i vårt distrikt må dei fleste avisene finna seg i nedgang, men heldigvis for oss er Grenda blant avisene som i staden veks.

 

Klapp på skuldra

Fyrste halvår 2020 viser at Grenda har auka opplaget med 43 aviser. Det er òg verdt å nemna at andre halvår 2019 hadde ein pluss på 59, noko som betyr ein nettoauke på så mange som 102 abonnentar på eitt år. Det er redaktør Håvard Sætrevik sjølvsagt strålande nøgd med.

– Det er veldig kjekt å sjå at trenden frå førre måleperiode held fram, og at stadig fleire set pris på avisa vi lagar. Vi tek det som eit klapp på skuldra, spesielt med tanke på at det norske folk og kvinnheringane har vore gjennom eit strevsamt halvår. Koronaen har også påverka Grenda. For vår del har pandemien betydd at vi har måtta laga avisa med ein mindre stab enn tidlegare. Då er det ekstra oppløftande at innsatsen til dei tilsette blir sett pris på, seier han.

 

Skaper samhald

Tomas Bruvik, tidlegare redaktør i både Grenda og Kvinnheringen, er no generalsekretær i LLA. Slik kommentarar han posisjonen til lokalavisene.

– Lokalavisene har alltid gjort ein viktig jobb. I tillegg til å gje innbyggjarane nyhende som betyr noko for folk sin kvardag, bidrar lokalavisene til å skapa samhald og lokal identitet. Også etter at korona-epidemien slo inn over Norge, har vi fått demonstrert at lokalavisene tar samfunnsansvar. Avisene våre har bidratt med livsviktig informasjon for innbyggjarane, seier han i ei pressemelding.