Opnar ny utstilling

Laurdag 20. juli opnar Lars Elling ny utstilling med måleri og grafikk i Galleri G Guddal.

 

– Lars Elling er ein historieforteljar. I bileta hans ligg lag på lag av symbolikk som ofte vekkjer nostalgiske minne, medan det urovekkjande ligg og lurer i bakgrunnen, skriv gallerist Gøril Guddal om 53-åringen som skal ha utstilling i Guddal.

Lars Elling er utdanna ved Kunsthøgskolen i Bergen og har hatt stor suksess både nasjonalt og internasjonalt med utstillingar rundt i Europa og USA. Arbeida hans er mellom anna innkjøpte av Nasjonalgalleriet, Trondheim Kunstmuseum, Norsk Kulturråd og Europakommisjonen.

– Familien er eit gjennomgåande tema i Elling sine arbeid; gjenkjennelege augeblikk infiltrert av overraskande eller ubehagelege element. Det formale aspektet i maleria blir karakterisert av det utviska og øydelagde. Det reine visuelle uttrykket har ein meiningsfull funksjon, der historie og poesi står som berande element, skriv Guddal i ein omtale av kunsten hans.

– Maleria kan ein sjå som forteljingar om augeblikk, der det nesten opplevde eller nesten sette blir presentert  i eit drøymande og poetisk uttrykk.  Og dei kan samanliknast med Francis Bacon sine poetiske arbeid. Som hos Bacon portretterer også Elling sine arbeid ei skildring av følelsane sin logikk, og dei har ei byrjing, ein midtdel og ein slutt, berre ikkje i den rekkjefølgja, legg ho til.

Rebekka Attramadal syng og spelar piano under utstillingopninga. Elling sine verk blir å sjå fram til 18. august.