Anita Maurangsnes og Christian Mæland opna tysdag Folgefonna Dyreklinikk på Løfallstrand.

Opna smådyrsklinikken

Ekteparet forlét Strømmen og nærleiken til storbyen for å gje kvinnheringane eit betre veterinærtilbod.

– Eg har jobba mange år for dette, smiler Anita Maurangsnes.

Løfallstrand-jenta er komen heim etter 15 år med adresse utanfor Kvinnherad. Dei 12 siste har 34-åringen halde lag med Christian Mæland, veterinæren som tysdag kunne ta i mot sine første kundar i dyreklinikken.

Artikkelen held fram under annonsen.

– Eg er veldig glad for at me er her no, smiler Christian tilbake.

Folgefonna Dyreklinikk vert ei familiebedrift av det klassiske slaget. Christian skal i tillegg til å vera dyrlege ta seg av papirarbeidet. Anita skal jobba fire dagar på klinikken, og i 50 prosent stilling på

Rosendalstunet. I etasjen over klinikken har dei bygt seg leilegheit som skal husa både dei og døtrene på tre og seks år.

 

Tannekspert

Familien har forlate livet på Strømmen og eit trygt liv som tilsette i høvesvis ei kjede med dyreklinikkar og på sjukehus, og satsar no friskt på å skapa sin eigen arbeidsplass.

– Det var to scenario for oss då me flytta hit. Me kunne kjøpa leilegheit i Rosendal og leiga lokale til klinikken, eller me kunne byggja vår eigen klinikk med eit husvære inkludert. Og eg ser mange føremoner ved å velja som me har gjort, seier Christian.

Blant anna ser han at tid og tilgjenge blir heilt annleis ved å bu slik.

Artikkelen held fram under annonsen.

– Om det skjer noko akutt ein kveld eller ei helg, er det ei trapp ned og så er eg på plass i klinikken. Det er praktisk og eg sparar tid på reise, seier Christian.

Han er tannekspert og har utstyrt klinikken for å kunna halda fram som det, men innser at han neppe får vøla like mange tenner og kjevar no som før.

– Eg får heller driva min eigen klinikk og vera ein god allmennveterinær.

 

Draumelivet

I klinikken på Myre på Løfallstrand skal Christian og Anita ta i mot det kjæraste mange eig.

– Det er ikkje sikkert det ville vore marknad for ein smådyrsklinikk i Kvinnherad for ti år sidan, men me trur viljen til å gå til veterinær med smådyr er større no. Samstundes må folk ha eit sjukt dyr for at me skal ha kundar, påpeikar Christian.

– Er det spennande eller skremmande å starta klinikken?

Artikkelen held fram under annonsen.

– Det har vore kjempespennande heilt fram til ein halvtime før klinikken opna, då blei det skremmande, ler Christian.

Ekteparet gler seg storleg over mottakinga dei og jentene har fått, og ser fram til livet på bygda, der kort veg til både badestrand og lyren i fjorden tel på plussida.

– Me skal kunna sova godt om natta, men eg treng ikkje bli rik. Viss eg har ein jobb eg trivst med i Rosendal-området, så er det bra. Eg har på sett og vis kjøpt meg ein arbeidsplass her, og sånn sett kjøpt meg draumelivet. Men eg har ikkje kjøpt meg draumebankkontoen, smiler 36-åringen frå Oslo.

– Men sjå den utsikta då! Du får ikkje slikt på Romerike.