Søndag opna Halsnøy Kloster for sesongen, med keramikkutstilling signert Signe Schineller. Foto: Linda Øen.

Opna klosteret og utstilling

Klosterdagen vart utsett grunna Covid-19-viruset, men då klosteret skulle opna dørene igjen trengte dei eit alternativ på kort varsel. Redninga vart Signe Schineller.

– Det kom i stand på kort varsel, fordi det skulle eigentleg vore ei anna utstilling i klosteret. Den skulle ha opna på klosterdagen i byrjinga av juni, men vart i koronastenginga utsett til hausten, fortel Helen Petersen ved Halsnøy Kloster.

Artikkelen held fram under annonsen.

Ho hadde dialog med Schineller i vinter, utan å landa noko då.

– Me tenkte me måtte ha noko her når me opna at. Eg snakka med Signe og ho heiv seg rundt og laga mykje keramikk på ein månad, frå smått til større ting, fortel Petersen.

Opninga var på søndag, og det var 50-60 nyfikne til staden på opningsdagen.

– Me må følgja lover og reglar for smittesporing og hygiene, og har alle som var innom i skjema. Det kjem folk kvar dag, og me hadde godt sal på opningsdagen, seier klosterleiaren nøgd.

Utstillinga til Scihneller opna på søndag, og kjem til å stå fram til 9. august. Halsnøy Kloster har tre guida omvisingar dagleg, og i tillegg til utstillinga som opna søndag, er det også ei historisk utstilling i kjellaren. Sistnemnde opna i fjor og står fast i klosteret.