Om nordlandsfarten på båtbyggjedag i Ølve

Den årlege båtbyggjedagen på skipsbyggjeplassen Øyra på Nerhus i Ølve går i år av stabelen søndag 8. september.

Årets tema er nordlandsfarten, transporten av tørrfisk frå Nordland til Bergen på seglskuter bygde blant anna i Ølve. Etnolog Randi Storaas held føredrag om dette klokka 14 og viser deretter biletspelet ho har laga om Nordlandsfarten.

I fjor kom meir enn 150 menneske til Haktorverftet og Tollevsverftet som opna dørene til utstillingar av verktøy, båtmodellar og bilete frå den gongen dei bygde båtar på Øyra. Utstillingane er opne også i år, som før blir det båtbygging for born med basseng for segling med nybygde båtar. Kafeen byr på lapskaus, vaflar, pølser, saft og kaffi. Gamle båtar kjem seglande til Øyra og det blir trekkspeltonar på kaien.

Kulturnemnda i Ølve bygdelag gler seg over at båtbyggjedagen ser ut til å ha blitt tradisjon og at dette arrangementet trekkjer heile familien; born, foreldre og besteforeldre. Båtbyggjedagen blir skipa til i samarbeid med Kystkultur.no og med støtte frå Kvinnherad kommune.

Utstillinga i Banken ved Dalsjøen om baksteheller og gruvedrift er open denne dagen for dei som vil ta turen innom på veg til eller frå Øyra.