Stein og steinbygging:

– Om å gjera gull av gråstein

Freelands Grenda

Grenda

post@grenda.no

Publisert: 9. februar 2019, 08:01

Torsdag 14. februar kjem Eva Røyrane til Rosendal Samfunnshus og Kvinnherad Senioruniversitet. Røyrane vaks opp i Ølve i Kvinnherad, har vore journalist i Bergens Tidende og har òg jobba i NRK. I dag er ho tilsett ved Universitetet i Bergen.

Ho har vore fleire gonger i Kvinnherad; sist i Galleri Guddal med presentasjon av boka «Klyngetunet – Den norske landsbyen» som ho laga saman med fotograf Oddleiv Apneseth. Eva Røyrane, forfattar av boka «Norges Låver» og «Fabrikkbyane i Hardanger».

No skal ho snakke om stein og steinbygging. Gråsteinen var gull verd i bonden sitt landskap. Steinen var spadd opp av jorda, henta i ura eller sprengd ut or fjellet, og det vart reist milevis av steingardar, vakre veganlegg, små og store steinhus. I dag står dei gamle murane og fortel historie –  om levemåten den gongen då stein var ein av få ressursar mange bønder hadde rikeleg av.

I boka «Av stein» dokumenterer forfattar Eva Røyrane og fotograf Oddleiv Apneseth vakre byggverk og tunge tak. Boka viser at dugande handverkarar fekk reist mange murar sjølv om steinen var alt anna enn samarbeidsvillig.

Eva Røyrane kjem til Kvinnherad Senioruniversitet for å fortelja om arbeidet med denne boka. Føredraget hennar gjer oss kjende med steingarden, bakkemuren, steinløa, gardfloren, torvhuset og – ikkje minst kjøleskåpet utan stikkontakt – jordkjellaren.

Servering som vanleg etter føredraget. Siste post på programmet er årsmøte i senioruniversitetet.

 

Av Kvinnherad Senioruniversitet